Kandydat u prezidenty ZŠA ad Demakratyčnaj partyi Džo Bajden zajaviŭ u aŭtorak, što jon uzmocnić cisk na chaŭruśnikaŭ Alaksandra Łukašenki, piša Reuters.
«Mižnarodnaja supolnaść pavinna značna pašyryć svaje sankcyi ŭ dačynieńni da pasłuhačoŭ Łukašenki i zamarozić afšornyja rachunki, na jakich jany zachoŭvajuć svaje skradzienyja bahaćci», — havorycca ŭ zajavie byłoha vice-prezidenta. «Jak prezident, ja taksama budu pracavać z našymi jeŭrapiejskimi partniorami i sajuźnikami, kab raspracavać płan ekanamičnaj padtrymki sapraŭdy suvierennaj, demakratyčnaj Biełarusi <…>
Ja budu praciahvać vystupać razam sa Śviatłanaj Cichanoŭskaj i narodam Biełarusi z zaklikam da mirnaj pieradačy ŭłady, vyzvaleńnia ŭsich palityčnych źniavolenych i praviadzieńnia svabodnych i spraviadlivych vybaraŭ z tym, kab biełarusy, narešcie, mahli skarystacca tymi demakratyčnymi pravami, u baraćbie za jakija jany panieśli takija achviary».
U zajavie adznačajecca taksama, što prezident ZŠA Donald Tramp «admaŭlajecca vykazvacca» ŭ padtrymku biełaruskaha naroda, u toj čas jak Bajden «maje namier padtrymlivać demakratyčnyja spadziavańni» biełarusaŭ i «asudžaje aburalnyja parušeńni pravoŭ čałavieka».
Tym časam kiraŭnik pres-słužby Dziarždepartamienta ZŠA Morhan Artehus paviedamiła, što ŭłady Złučanych Štataŭ praciahnuć padtrymlivać zakonnyja pamknieńni naroda Biełarusi.
«Złučanyja Štaty i ŭvieś śviet salidarnyja z narodam Biełarusi. Jon prademanstravaŭ niezvyčajnuju mužnaść i siłu pierad tvaram žorstkich represij. My budziem praciahvać padtrymlivać ich zakonnyja pamknieńni», — napisała jana ŭ svaim Twitter.
Tak jana prakamientavała paviedamleńnie amierykanskaj dypmisii ŭ AAN ab dałučeńni ZŠA da 51 dziaržavy — siabra AAN i delehacyi ES u asudžeńni parušeńnia pravoŭ čałavieka, jakoje praciahvajecca ŭ Biełarusi.
