U Minsku siońnia da 200 tysiač čałaviek zapoŭnili centralnyja vulicy. Siłaviki atakavali demanstrantaŭ na finalnym etapie šeścia, u rajonie vulicy Arłoŭskaja.
«Šeście narodnaha ultymatumu» mirna prajšło kala 10 kiłamietraŭ praśpiektami Pieramožcaŭ, Mašerava, vulicami Bahdanoviča i Surhanava, ale na 4-j jaho hadzinie siłaviki abstralali demanstrantaŭ śviatłošumavymi hranatami ŭ rajonie vulic Arłoŭskaja, Navavilenskaja, Čarviakova.
Jość paranienyja, ich dastavili ŭ vajskovy špital.
ŚMI publikujuć videa, na jakich bačnyja ŭspyški ŭ rajonie vulicy Arłoŭskaj. Na hetaj vulicy čutnyja šmatlikija vybuchi, a ludzi raźbiahajucca.
Razhon pačaŭsia nastupnym čynam. Chvost kałony na Arłoŭskaj padpirali siłaviki na busach. Na minułych demanstracyjach z takich busaŭ urešcie vyskakvali ludzi biez apaznavalnych znakaŭ i pačynalisia zatrymańni. Hetym razam ludzi ich pahnali, tyja musili zdać nazad. Ale na skryžavańni Arłoŭskaj i Navavilenskaj jany pierahrupiravalisia i, kali demanstranty da ich nablizilisia, u ich bok palacieli śviatłošumavyja hranaty. Tady ludzi kinulisia pa dvarach, a siłaviki pačali začystku.
Marš pratestu 25 kastryčnika ŭ Minsku byŭ samym masavym ad 30 žniŭnia. Pa roznych padlikach, tolki ŭ Minsku na vulicy vyjšła da 200 tysiač čałaviek. Jany skandavali «Zabastoŭka!» i «Zaŭtra vychadny» ŭ padtrymku zakliku Śviatłany Cichanoŭskaj da ahulnanacyjanalnaj stački pratestu ad 26 kastryčnika.
Siłaviki taksama atakavali demanstrantaŭ u Lidzie, Breście, Hrodnie, Barysavie, Viciebsku, Navapołacku, Homieli. U Lidzie suprać pratestoŭcaŭ byŭ užyty ślezaciečny haz. U Breście i Hrodnie zatrymana da 140 čałaviek.