19 kastryčnika sud Leninskaha rajona Bresta vynies rašeńnie pa spravie byłoj supracoŭnicy adździeła ideałohii Bresckaha harvykankama Viktoryi Drahabieckaj i jaje muža Dźmitryja Łazarčuka: jany abvinavačvalisia va ŭdziele ŭ niesankcyjanavanym mierapryjemstvie, piša Tut.by.
Fota z sacsietak
Ich abvinavačvali va ŭdziele ŭ pratestnym maršy 13 vieraśnia. U materyjałach spravy jość videazapis, na jakim bačna, jak Viktoryja z mužam išli pa prajeznaj častcy praśpiekta Mašerava.
Viktoryja i Dźmitryj pryznali vinu całkam. Dziaŭčyna patłumačyła, što ŭ toj dzień jany z mužam hulali pa centry Bresta, ubačyli ŭdzielnikaŭ maršu i vyrašyli pahladzieć, što adbyvajecca.
Zatrymali Viktoryju z mužam praź miesiac. Ich spynili 16 kastryčnika na vychadzie z Doma pravasudździa, kudy jany pryjechali padtrymać znajomaha, jakoha sudzili pa tym ža artykule 23.34 KaAP. Vychadnyja Viktoryja i Dźmitryj praviali ŭ IČU Leninskaha RAUS, a ŭ paniadziełak ich pryvieźli ŭ sud.
Padčas pasiadžeńnia začytali charaktarystyki Viktoryi ź minułych miescaŭ pracy «Buh-TB» i Bresckaha harvykankama. Abiedźvie — stanoŭčyja. Taksama da materyjałaŭ spravy prykłali hramatu za aktyŭny ŭdzieł u padrychtoŭcy mierapryjemstvaŭ da 1000-hodździa horada. Padtrymać Viktoryju pryjšli jaje kalehi-žurnalisty.
Da administracyjnaj adkaznaści jana raniej nie pryciahvałasia.
Sud pryznaŭ Viktoryju i Dźmitryja vinavatymi pa č.1 art. 23. 34 KaAP i pryznačyŭ kožnamu pa 15 sutak aryštu.