Siadziačy pratest navukoŭcaŭ na prystupkach prezydyjumu Akademii navuk, Uładzimier Šypiła (u centry)
Siarod aŭtaraŭ lista salidarnaści — akademiki Polskaj akademii navuk, dyrektary instytutaŭ i muzejaŭ, staršynia i prezydyjum Kamitetu etnalahičnych navuk PAN, kiraŭnictva Polskaha etnalahičnaha tavarystva, piša «Radyjo Svaboda».
Polskija antrapolahi napisali list biełaruskamu navukoŭcu-antrapolahu Ŭładzimieru Šypiłu, jakoha zatrymali 13 kastryčnika paśla siadziačaha pratestu supracoŭnikaŭ Akademii navuk Biełarusi. Paźniej Šypiłu zasudzili na 7 dzion aryštu za ŭdzieł u niesankcyjanavanaj akcyi pratestu.
Padčas akcyi Ŭładzimier Šypiła trymaŭ u rukach plakat z cytataj z artykuła staršyni prezydyjumu NAN Biełarusi U. Husakova i člena-karespandenta Akademii A. Kavaleni «Biełorussko-russkoje dvujazyčije — istoričieski słoživšajasia duchovno-kulturnaja ciennosť naroda».
List małodšamu navukovamu supracoŭniku adździełu antrapalohii Instytutu historyi NANB Uładzimieru Šypiłu padpisany 17 kastryčnika 2020 hodu 50 navukoŭcami z roznych haradoŭ Polščy: Hdańsk, Krakaŭ, Łodź, Poznań, Žešaŭ, Toruń, Varšava, Urocłaŭ. U im vykazvajecca salidarnaść i z aryštavanym navukoŭcam, i ź inšymi achviarami represij, i ź biełaruskim narodam, jaki zmahajecca za svabodu i demakratyju.
«Šanoŭny spadar mahistar, darahi kaleha, — pišuć polskija antrapolahi.— My ŭzrušanyja aryštam Vas jak udzielnika mirnaj akcyi pratestu pierad budynkam Nacyjanalnaj akademii navuk Biełarusi — i samim faktam, i tym, jak heta było ŭčyniena.
Vy razam ź inšymi vučonymi z Akademii pratestavali suprać žorstkaha hvałtu na biełaruskich vulicach, kryvavyja sceny jakoha my z bolem nazirajem užo bolš za dva miesiacy. U toj ža čas Vy publična vykazalisia suprać prapahandysckaha tekstu aŭtarstva akademikaŭ U. Husakova i A. Kavaleni, jakija pad vyhladam navukovaha artykuła pra bilinhvizm vykłali antybiełaruskuju apalohiju rasiejskaj movy, jakaja zasłuhoŭvaje źmiastoŭnaha i maralnaha asudžeńnia. My ličym, što mienavita krasamoŭnaja cytata z hetaha tekstu, demanstravanaja Vami padčas pratestu, stała pryčynaj Vašaha zatrymańnia i aryštu ŭ aŭtorak, 13 kastryčnika.
Jak hramadzianie Polščy i Eŭropy, jakim blizkija demakratyčnyja kaštoŭnaści i pravy čałavieka, a taksama jak siabry antrapalahičnaj supolnaści, jakija ŭ navukovaj pracy kirujucca imknieńniem da praŭdy, my vykazvajem Vam i Vašym paplečnikam svaju padtrymku i salidarnaść. My ŭvažliva sočym za chodam padziejaŭ u Biełarusi. My nadzvyčaj vysoka cenim mužnaść i nastojlivaść biełarusak i biełarusaŭ, jakija damahajucca pavahi da ichnaj voli i hodnaści jak vybarnikaŭ i hramadzian, i zachaplajemsia imi.
My salidarnyja z pratestami biełaruskich navukoŭcaŭ i studentaŭ, padzialajučy jak ichnyja patrabavańni praŭdy i prystojnaści ŭ hramadzkim žyćci, tak i supraciŭ palityčnamu kantrolu nad navukovym žyćciom.
Chłuśnia i kańjunkturnyja manipulacyi ŭ navucy majuć karotkaje žyćcio, bo navuka — heta prastora svabodnaj i krytyčnaj dumki. My vierym, što svaboda ŭva ŭsich sferach hramadzkaha žyćcia nieŭzabavie stanie, siarod inšaha, dziakujučy pazycyi takich ludziej, jak Vy, usieahulnym nabytkam jak biełaruskich navukoŭcaŭ, tak i ŭsich hramadzian, a vinavatyja ŭ fizyčnym i symbaličnym hvałcie buduć pryciahnutyja da adkaznaści».
