U sudzie Leninskaha rajona Bresta 8 kastryčnika adbyłosia pasiadžeńnie pa administracyjnaj spravie viadomaha bresckaha krajaznaŭcy, redaktara haziety «Carkva» Ihara Baranoŭskaha. Jaho abvinavačvali ŭ tym, što 4 kastryčnika ŭ rajonie 16:00-16:30 jon źjaŭlaŭsia ŭdzielnikam niesankcyjanavanaha masavaha mierapryjemstva na vulicy Savieckaj i adkryta vykazvaŭ svaje palityčnyja pohlady — išoŭ u kałonie i plaskaŭ u ładki, paviedamlaje «Bresckaja hazieta».
Sam Baranoŭski svaju vinu nie pryznaŭ. Jon zajaviŭ, što ŭ toj dzień išoŭ pa Savieckaj u hości da siastry, nijakich šeściaŭ, mitynhaŭ ci inšych mierapryjemstvaŭ nie bačyŭ, adpaviedna, udziełu ni ŭ čym nie braŭ. Tak, jon viedaŭ, što pa niadzielach u centry Bresta prachodziać akcyi pratestu, ale dla vizitu da siastry śpiecyjalna abraŭ taki čas, kali ŭsio ŭžo pavinna było skončycca.
Sudździa Alaksandr Siemiančuk vynies vierdykt: 15 sutak aryštu.
Ihar Baranoŭski byŭ šakavany takim rašeńniem. Paśla sudu jon skazaŭ, što ŭ najhoršym vypadku raźličvaŭ na štraf, ale nijak nie na aryšt, tym bolš na taki termin. Bieraściejec zajaviŭ, što surjozna zadumvajecca nad tym, kab abviaścić haładoŭku jak znak pratestu suprać samavolstva, jakoje, nibyta, adbyvajecca.
Ihar Baranoŭski — viadomy ŭ Breście historyk, krajaznaŭca. Čverć stahodździa jon źjaŭlajecca redaktaram haziety «Carkva», jakuju vypuskaje hreka-katalickaja carkva. Adzin ź pieršych viernikaŭ hreka-katalickaj hramady ŭ Breście.
