Jašče naprykancy žniŭnia hienieralnaja prakuratura abviaściła, što pad jaje ehidaj stvoranaja Mižviedamasnaja kamisija, jakaja voźmie na siabie vyvučeńnie skarhaŭ ludziej, jakich źbivali i ź jakich ździekavalisia siłaviki. Užo dva miesiacy prajšło z dnia vybaraŭ, ale pra vyniki dziejnaści kamisii zusim ničoha nie viadoma.
Namieśnik hienprakurora Dźmitryj Hara 26 hadoŭ prasłužyŭ u KDB. Fota z sajta Hienprakuratury.
Nieviadoma, kolki razoŭ jana źbirałasia, da jakich vysnoŭ pryjšła, navat da apošniaha času nie było viadoma, chto jaje ŭznačalvaje. U kamientary «NN» deputat Pałaty pradstaŭnikoŭ Alaksandr Dubaŭ tolki skazaŭ, što heta adzin z namieśnikaŭ hienieralnaha prakurora.
U samoj Hienprakuratury nazyvać imia kiraŭnika kamisii naadrez admovilisia. «Niavažna, chto źjaŭlajecca kiraŭnikom», — adkazvali ŭ pres-słužbie.
Daviedacca, chto ž uznačalvaje hetuju kamisiju, atrymałasia z adkazu deputatki Pałaty pradstaŭnikoŭ, jaki jana dasłała viciablancy Irynie Barysievič. Žančynu zatrymlivali 12 žniŭnia padčas akcyi salidarnaści.
Ad Aŭtuchovaj pryjšoŭ taki adkaz: «Kali majuć miesca być fakty pieravyšeńnia słužbovych paŭnamoctvaŭ siłavych viedamstvaŭ, to hramadzianie majuć prava źviarnucca ŭ respublikanskuju mižviedamasnuju kamisiju, jakuju ŭznačalvaje namieśnik hienieralnaha prakurora Dźmitryj Hara. Vašy dovady ab tym, što ŭ Biełarusi nie vykonvajucca zakony, nieabhruntavanyja».
Dźmitryj Hara staŭ namieśnikam hienieralnaha prakurora 30 śniežnia 2019 hoda. Jamu 50 hadoŭ, rodam z Tbilisi (Hruzija). Vučyŭsia na pravaznaŭstvie ŭ Vajskovym Krasnaznamionnym instytucie Minabarony ŭ Maskvie. Ad 1993 hoda pracavaŭ śledčym u KDB. U 2009 staŭ načalnikam śledčaha ŭpraŭleńnia KDB.
