Aŭtar novaha «Aktu ab demakratyi Biełarusi» kanhresmen Krystafer Śmit havoryć pra hałoŭnuju pamyłku raniejšych zachadaŭ, tłumačyć, jak biełaruski «Akt» 2004 hodu staŭ pravaobrazam hlabalnaha «Aktu Mahnickaha», adkazvaje, čamu ŭ razhar vybarčaj kampanii ŭ ZŠA amerykanskija palityki dumajuć pra Biełaruś, piša «Svaboda».
Ekskluziŭnaje interviju vioŭ dyrektar Biełaruskaj słužby «Radyjo Svaboda» Alaksandar Łukašuk.
— Novy zakonaprajekt, vyniesieny ŭčora na hałasavańnie Pałaty pradstaŭnikoŭ, maje pašyranuju ŭ paraŭnańni z papiaredniaj nazvu: «Akt ab demakratyi, pravach čałavieka i suverenitecie Biełarusi». Uvahu šmat kaho pryciahnuli słovy pra padtrymku biełaruskaj movy, nacyjanalnaj kultury, histaryčnych symbalaŭ — jakaja meta hetych novych dapaŭnieńniaŭ u zakonaprajekcie, pryśviečanym pabudovie demakratyi?
— My chočam zrabić tak, kab Biełaruś zastavałasia Biełaruśsiu. Kab jana nie była inkarparavanaja ŭ Rasieju ci padparadkavanaja joj. Farmuloŭki ŭ zakonaprajekcie, jak vy pravilna zaŭvažyli, adnaznačna śviedčać, što naša palityka — nijakaha pryznańnia inkarparacyi Biełarusi u sajuznuju dziaržavu z Rasiejaj. Maskva pryjšła na dapamohu režymu Łukašenki, całkam pieraniaŭšy jaho «public relations» — kamunikacyi z vonkavym śvietam. Jany ŭžo žachlivyja, ale Maskva jašče hłybiej zanuryłasia ŭ biełaruskija spravy. My bačym, što heta moža chutka pieraraści ŭ sytuacyju, kali suverenitet moža być stračany. My spadziajomsia, što Biełaruś zastaniecca Biełaruśsiu, ale stanie demakratyčnaj Biełaruśsiu.
Što da pravoŭ čałavieka — samyja lepšyja, samyja śmiełyja, samyja śvietłyja ludzi Biełarusi za kratami, źbityja, katavanyja. AAN nazyvaje ličbu 10 000 — nasamreč, praŭdapadobna, bolš — mirnych pratestoŭcaŭ, jakija byli zatrymanyja. Naš adkaz pavinien być suvymierny hetaj žachlivaj eskalacyi z boku Łukašenki. Ja viedaju biełaruskuju dyjasparu tut, u Štatach, viedaju šmat ludziej u Biełarusi. Hadami ja nia moh atrymać vizu ŭ Miensk, u Biełaruś. Kala ja atrymaŭ, ja sustrakaŭsia z Łukašenkam u składzie delehacyi Kanhresu, i jon nazvaŭ mianie «voraham narodu numar 1» — praz «Akt ab demakratyi Biełarusi».
Ja skazaŭ u adkaz: usio, čaho my damahajemsia, — heta kab u Biełarusi pavažalisia ŭsieahulnyja pravy čałavieka, a hetaha niama.
