Z šerahaŭ Ministerstva zamiežnych spraŭ paśla preidenckich vybaraŭ užo syšli niekalki dziasiatkaŭ čałaviek. Ale padobna, što na hetym zvalnieńni nie spyniacca.
Alaksandra Hrydziuška. Fota z ctv.by.
Litaralna na hetym tydni z centralnaha aparatu MZS syšła savietnica hałoŭnaha kadravaha ŭpraŭleńnia Alaksandra Hrydziuška. Zvalnieńnie maje hramadzianskuju afarboŭku, Alaksandra vykazvaje niazhodu z toj palitykaj, jakaja pravodzicca dziaržavaj u apošni čas.
Alaksandra Hrydziuška — heta dačka byłoha hiendyrektara Vialikaha teatra Biełarusi Uładzimira Hrydziuški. Darečy, raniej Alaksandra pracavała pieršym sakratarom pasolstva Biełarusi ŭ Łatvii.
Z pasolstva Biełarusi ŭ Ryzie było zvolniena adrazu dva supracoŭniki — heta savietnik-pasłańnik Alaksiej Maciuchievič i staršy savietnik Andrej Aŭramienka.
Andrej Aŭramienka. Fota z fejsbuka.
«17 hadoŭ u dypłamatyi ŭsio, dziakuj usim. Adkryty dla prapanoŭ», — napisaŭ Aŭramienka ŭ sacsietkach.
Varta adznačyć, što pasolstva Biełarusi ŭ Łatvii faktyčna abiezhałoŭlena. U adstaŭku byŭ adpraŭleny, a taksama pazbaŭleny dypłamatyčnaha ranhu pasoł Vasil Markovič. Pavodle adnoj ź viersij, Markoviču ŭ dakor było pastaŭlena toje, što mnohija supracoŭniki pradstaŭnictva nie pahadzilisia falsifikavać vybary i asudzili hvałt.
