Baćki dziaciej, jakija vučacca ŭ 61-j škole (rajon «Majaka Minska»), padrychtavali elektronnuju pietycyju ŭ adras administracyi. Sabrana ŭžo bolš za 300 podpisaŭ. U liście pieraličanyja patrabavańni da nastaŭnikaŭ: nijakaj ideałahičnaj raboty pad vyhladam infarmacyjnych hadzin, nijakaha cisku z ustupleńniem u BRSM. Baćki nie buduć dapamahać škole hrašyma, pakul ich nie pačujuć, piša rebenok.by.
U zvarocie padkreślivajecca, što lubaja palityčnaja rabota ź dziećmi ŭ škole amaralnaja i supraćzakonnaja, bo supiarečyć artykułam 4 i 33 Kanstytucyi Respubliki Biełaruś.
— Palityki i ideołahi prychodziać i sychodziać, a zdolnaść samastojna i niezaležna dumać zastaniecca i budzie dapamahać našym dzieciam žyć hodna i ščaśliva ciaham usich nastupnych hadoŭ žyćcia, — pišuć baćki.
Jany prosiać, kab navučalny praces zastavaŭsia całkam pa-za palitykaj, a infarmacyjnyja hadziny byli vyklučany z raskładu. Akramia taho, baćki patrabujuć pavažać pravy dziaciej i baćkoŭ i niezadavolenyja tym, što ich nie puskajuć na terytoryju škoły (nahadajem, u škołach heta tłumačać mieraj biaśpieki ŭ suviazi z karanavirusam).
— Previentyŭna adbirać u navučencaŭ telefony i inšyja asabistyja rečy, kali heta naŭprost nie škodzić adukacyjnamu pracesu, taksama niedapuščalna i supraćzakonna, — havorycca ŭ zvarocie.
Nahadvajuć baćki vučniaŭ i ab vybarach, jakija prajšli na terytoryi škoły. U liście padpisanty vykazvajuć niedavier členam administracyi i nastaŭnikam, jakija byli členami vybarkamaŭ, i čakajuć ad ich publičnych vybačeńniaŭ.
Da vykanańnia hetych patrabavańniaŭ baćki admaŭlajucca ad apłaty apiakunskich uznosaŭ i lubych inšych vydatkaŭ (ramont, padpiski i inšaje). Škoła abaviazana zabiaśpiečvać usio heta za košt biudžetnych srodkaŭ, «jakija farmirujucca ŭ tym liku i za košt padatkaŭ», ličać aŭtary lista. Taksama baćki majuć namier bajkatavać školnyja subotniki, zbor makułatury, farmiravańnie baćkoŭskich kamitetaŭ i pakidajuć za saboj prava pry nieabchodnaści nie vadzić dziaciej u škołu.
Žurnalistam nie ŭdałosia atrymać kamientar u administracyi škoły. Dyrektar Iryna Cubikava nie adkazvaje pa numary, ukazanym na sajcie škoły. Namieśniki nie kažuć, dzie kiraŭnik (pa słovach baćkoŭ, u jaje aformleny balničny list). Taksama namieśniki admaŭlajucca kamientavać situacyju biez dyrektara, adzin sa śpiecyjalistaŭ zapeŭniła, što nie viedaje ničoha pra zvarot baćkoŭ, u škole buduć z hetym raźbiracca.
Heta ŭžo nie pieršy vypadak, kali baćki sprabujuć adstojvać svaje pravy z dapamohaj adkrytych zvarotaŭ. Aŭtary lista da administracyi minskaj himnazii №56 taksama vystupili rezka suprać ideałahičnaj raboty ź dziećmi, asudzili falsifikacyju vybaraŭ i admovilisia ad vypłaty ŭznosaŭ u apiakunski saviet. Akramia taho, jany paprasili zvolnicca piedahohaŭ, jakija zaplamili svajo imia na vybarach.
