Pavieł Piaskoŭ i Uładzisłaŭ Jeŭścihniejeŭ na pieršym sudovym pasiadžeńni. Fota spring96.org
U sudzie Maładziečanskaha rajona 29 vieraśnia vynieśli prysud dvum maładziečancam — Paŭłu Piaskovu i Uładzisłavu Jeŭściahniejevu, jakich sudzili pa č. 2 art. 363 Kryminalnaha kodeksa za supraciŭ supracoŭnikam AMAPa z užyvańniem hvałtu padčas patasoŭki ź siłavikami na akcyi 19 červienia, na jakoj amapaviec dastaŭ pistalet. Sudździa Viktoryja Palaščuk pryznała abodvuch vinavatymi i pakarała ich pazbaŭleńniem voli ŭ kałonii ahulnaha režymu: Paŭła Piaskova — na try hady i try miesiacy, a Uładzisłava Jeŭściahniejeva — na try hady. Mienavita takoje pakarańnie dla maładziečancaŭ u sudździ i patrabavaŭ prakuror Siarhiej Habrukovič, piša spring96.org.
25-hadovaha Uładzisłava Jeŭściahniejeva zatrymali dla adbyćcia pakarańnia ŭ zale suda adrazu paśla ahałošvańnia prysudu. 31-hadovamu Paŭłu Piaskovu źmianili mieru strymańnia z chatniaha aryštu na zaklučeńnie pad vartu jašče 18 vieraśnia. Hetyja 11 dzion buduć zaličanyja ŭ 3-hadovy termin pazbaŭleńnia voli.
Sud vyrašyŭ, što Pavieł Piaskoŭ i Uładzisłaŭ Jeŭściahniejeŭ akazali hvałtoŭnaje supraciŭleńnie supracoŭnikam minskaha AMAPa Viačasłavu Jakavienku i Jaŭhienu Baranavu adpaviedna, tym samym ździejśnili złačynstva, praduhledžannaje č. 2 art. 363 KK.
Sud ustanaviŭ, što padčas dziejańniaŭ maładziečancaŭ amapaŭcy atrymali paškodžańni: paškodžańnie formiennaha abmundziravańnia i cialesnyja paškodžańni ŭ vyhladzie drapiny na kaleniach i łokcie, jakija nie paciahnuli za saboj karotkačasovaha rasstrojstva zdaroŭja i značnaj straty pracazdolnaści. U pieradapošni dzień sudovych raźbiralnictvaŭ sudovy miedekśpiert Michaił Skabiej, jaki ahladaŭ paciarpiełych amapaŭcaŭ i davaŭ zaklučeńnie pa ich paškodžańniach, skazaŭ, što zafiksavaŭ u Jakavienki drapinu na levym kalenie pamieram 2 sm na 1,5 sm. Ale fotafiksacyi paškodžańniaŭ nie rabiłasia — «nie praduhledžana ŭnutrannymi rasparadžeńniami».
Uładzisłaŭ Jeŭściahniejeŭ, spring96.org
Na sudzie Uładzisłaŭ Jeŭściahniejeŭ pryznaŭ vinu całkam, Pavieł Piaskoŭ — častkova. Jeŭściahniejeŭ rastłumačyŭ svaje dziejańni tym, što ŭ patasoŭku ŭviazaŭsia praz kryk žančyny kala milicejskaha busa. Jon padumaŭ, što žančynie robiać bolna. Tady jon padbieh da supracoŭnika AMAPa i «prychapiŭ jaho rukoj», paśla čaho ŭ vyniku cisku natoŭpu ludziej i praz toje, što Jeŭściahniejeŭ padviarnuŭ nahu, i ŭpali z supracoŭnikam AMAPa:
«Ja trymaŭsia za amapaŭca, kab, padajučy, nie ŭdarycca ab plitku».
Pavieł Piaskoŭ, spring96.org
Pavieł Piaskoŭ zajaviŭ na sudzie, što na vulicy pačuŭ kryki nakšałt «Ratujcie, dapamažycie!» i ŭbačyŭ patasoŭku, u jakoj «amapaviec naciskaje na čałavieka», paśla čaho jon umiašaŭsia. Pa jaho słovach, jon chacieŭ spynić hety kanflikt, bo tam prysutničali dzieci i heta adbyvałasia ŭ hramadskim miescy. Namieru pryčynić škodu supracoŭnikam AMAPa, jak śćviardžałasia padčas suda, nie było ni ŭ Paŭła Piaskova, ni va Uładzisłava Jeŭściahniejeva.
Nahadajem, 19 červienia ŭ Maładziečnie padčas akcyi salidarnaści maładziečancy pasprabavali adbić u siłavikoŭ zatrymanaha Mikołu Alejnika. Kadry patasoŭki kala milicejskaha mikraaŭtobusa vyklikali vialiki rezanans, bo adnym ź videa bačna, što ŭ niejki momant u rukach adnaho z amapaŭcaŭ apynuŭsia pistalet. Śledčy kamitet Biełarusi zavioŭ kryminalnuju spravu pa artykule 363 «Supraciŭleńnie supracoŭniku orhanaŭ unutranych spraŭ ci inšaj asobie, jakaja achoŭvaje hramadski paradak».
U miežach hetaj kryminalnaj spravy byli zatrymanyja 25-hadovy Uładzisłaŭ Jeŭściahniejeŭ i 31-hadovy Pavieł Piaskoŭ. 16 vieraśnia sud Maładziečanskaha rajona pačaŭ razhlad kryminalnaj spravy ŭ dačynieńni da ich. Adzin z padazravanych pa hetaj spravie — Uładzimir Niepahoda — znachodzicca ŭ vyšuku.
