Hałoŭny redaktar «Našaj Nivy» Jahor Marcinovič u sudzie
Siońnia, 28 vieraśnia, hałoŭnaha redaktara «Našaj Nivy» Jahora Marcinoviča vyklikali da 10:00 u sud Zavodskaha rajona pa administracyjnaj spravie.
Jaho žonka, žurnalistka Adarja Huštyn, ličyć, što heta moža być sprava pa fakcie jahonaha zatrymańnia ŭnačy z 10 na 11 žniŭnia, kali śpiecnazaŭcy vyciahnuli jaho z mašyny, zakinuli ŭ aŭtazak, źbili, noč trymali na ziamli kala Zavodskaha RUUS, a paśla pieravieźli ŭ žodzinskuju turmu. Ahułam jon tady pravioŭ za kratami paŭtara sutak.
Nahadajem, Jahor Marcinovič byŭ zatrymany ranicaj 23 vieraśnia pa spravie ab nibyta paklopie (art. 188 KK) u adnosinach da namieśnika ministra ŭnutranych spraŭ Barsukova. Jon pravioŭ ŭ IČU na Akreścina troje sutak i byŭ vypuščany na svabodu. Jahor zastajecca ŭ statusie padazravanaha pa hetaj kryminalnaj spravie.
Jak raskazaŭ Jahor Marcinovič, rašeńnie ab zaviadzieńni kryminalnaj spravy ŭ adnosinach da jaho było pryniata ŭ paniadziełak, 21 vieraśnia. Tady jak pozva z suda Zavodskaha rajona pa administratyŭnaj spravie datujecca 22 vieraśnia.
11 žniŭnia Jahor Marcinovič byŭ zatrymany va ŭłasnaj mašynie, kali kala 2-j hadziny nočy jechaŭ zabirać svaju žonku, žurnalistku TUT.BY Adarju Huštyn, što pracavała ceły viečar kala mietro «Puškinskaja», dzie ŭ toj dzień adbyvalisia pratesty suprać falsifikacyi vynikaŭ prezidenckich vybaraŭ.
Žonka Jahora Marcinoviča Adarja Huštyn (źleva). A sprava — jahonaja maci, viadomaja žurnalistka, piśmieńnica i mastactvaznaŭca Taćciana Mušynskaja
Sutyčak i demanstracyj u momant zatrymańnia ŭžo nie adbyvałasia.
Asoby z aŭtamatami, jakija zatrymlivali Marcinoviča, praihnaravali jahonaje žurnalisckaje paśviedčańnie.
Mašyna zastałasia stajać na prajeznaj častcy z adkrytymi dźviaryma. Vypadkova aŭtamabilist pabačyŭ jaje, spyniŭsia i adbuksiravaŭ u susiedni dvor. Tam jana prastajała nie zamknionaj amal dva dni. Ničoha pry hetym ź jaje nie prapała — ni noŭtbuk, ničoha.
Bolš za 36 hadzin ani siamja, ani kalehi nie viedali, što zdaryłasia z Marcinovičam. Urešcie 12 žniŭnia jon znajšoŭsia ŭ izalatary Žodzina i jaho adpuścili. Jamu skazali, što jaho adpuskajuć pa rašeńni ministra ŭnutranych spraŭ Karajeva. Aŭtamabilem MUS jaho dastavili z Žodzina ŭ Minsk.
Intaresy Jahora Marcinoviča ŭ sudzie reprezientuje advakat Siarhiej Zikracki.
Razhladaje administracyjnuju spravu sudździa Alena Niakrasava.
Paśla troch sutak na Akreścina vypuścili hałoŭnaha redaktara «Našaj Nivy» Jahora Marcinoviča
