Pra heta havorycca ŭ zajavie MZS u suviazi z reakcyjaj šerahu zamiežnych krain na inaŭhuracyju Łukašenki.
«Biełaruski narod, jaki źjaŭlajecca adzinaj krynicaj ułady i nośbitam suvierenitetu zrabiŭ svoj vybar. Mienavita heta maje vyznačalnaje značeńnie. Niejkija vynajdzienyja asobnymi hulcami pracedury źniešniaj lehitymacyi sa usich kropak hledžańnia nikčemnyja», — havorycca ŭ zajavie, apublikavanaj na sajcie MZS.
«My daŭno źjaŭlajemsia mižnarodna pryznanaj niezaležnaj dziaržavaj i raŭnapraŭnyja z usimi inšymi na mižnarodnaj arenie. Zabarona na ŭmiašańnie va ŭnutranyja spravy źjaŭlajecca adnym z krajevuholnych pryncypaŭ mižnarodnaha prava, jaki zamacavany ŭ artykule 2 Statuta AAN. Tamu biełarusy samastojna i biez vonkavaha ŭmiašańnia vybirajuć kiraŭnika svajoj dziaržavy, parłamient i miascovyja saviety. Biełaruski narod nie maje patreby ŭ «lehitymizacyi» svajoj ułady z boku samanazvanych fakultatyŭnych «lehitymataraŭ».
«Dadzienaje pytańnie źjaŭlajecca nadumanym i štučnym. Sproby asobnych krain Zachadu pastavić pad sumnieŭ lehitymnaść kiraŭnika dziaržavy ni ŭ jakaj miery nie adlustroŭvajuć dumki pieravažnaj bolšaści mižnarodnaj supolnaści.
Asablivaje ździŭleńnie vyklikajuć pavodziny našych ukrainskich susiedziaŭ, jakija ŭžo navat nie sprabujuć zakamuflavać niesamastojnaść u pryniaćci svaich źniešniepalityčnych rašeńniaŭ i nie spyniajuć patok zajaŭ nibyta sa svaimi «prasunutymi» acenkami čamuści našaj unutrypalityčnaj situacyi.
Składvajecca adčuvańnie, što mienavita «navučycca vučyć» pakul źjaŭlajecca hałoŭnym vynikam ukraina-jeŭrapiejskaha supracoŭnictva. Pry hetym zaklikanyja dahadzić modnym trendam zajavy hučać ad pradstaŭnika ŭrada susiedniaj dziaržavy, jakuju Biełaruś ščyra i bieskaryśliva padtrymlivaje, zaniaŭšy absalutna niezaležnuju i samastojnuju pazicyju. Choć, miarkujučy pa ŭsim, kiraŭnik MZS Ukrainy i nie ličyć heta važnym dla svajoj krainy.
Ale my praciahniem padtrymlivać braterski ŭkrainski narod. Biełaruś nikoli nie ŭmiešvałasia i nie maje namieru ŭmiešvacca va ŭnutranyja spravy inšych dziaržaŭ. Čakajem ad našych zamiežnych partnioraŭ anałahičnaha padychodu.
Pavaha, raŭnapraŭje, ulik intaresaŭ adno adnaho — voś asnoŭnyja pryncypy i pryjarytety, jakija lažać u asnovie narmalnaha suisnavańnia dziaržaŭ u duchu dobrasusiedstva i partniorstva ŭ intaresach usich hramadzian. Biełaruś nikoli nie imknułasia i zaraz nie imkniecca da kanfrantacyi»
«My — za dyjałoh. Bolš taho, my nieadnarazova na roznych uzroŭniach padkreślivali, što zacikaŭleny raźvivać uzajemavyhadnaje kanstruktyŭnaje supracoŭnictva z usimi mižnarodnymi partniorami», — adznačajecca ŭ zajavie MZS.
