Z takim prahnozam vystupiła ŭ aŭtorak kanfierencyja AAN pa handli i raźvićci (JUNKTAD), piša TASS.
Jak adznačajecca ŭ apublikavanym joju dakładzie, «sioleta suśvietnaja ekanomika skarocicca bolš čym na 4%». Pakolki ŭnutranaja aktyŭnaść rezka źnižajecca amal paŭsiudna, to heta adbivajecca na ekanomicy. «Suśvietny handal u hetym hodzie skarocicca prykładna na adnu piatuju, pramyja zamiežnyja inviestycyi — da 40%, a hrašovyja pieravody — bolš čym na $100 młrd», — pakazvajuć ekśpierty.
Samaje vialikaje absalutnaje padzieńnie abjomaŭ vytvorčaści čakajecca ŭ raźvitych krainach, pryčym u niekatorych ź ich jano budzie vymiaracca dvuchznačnymi ličbami. U toj ža čas najbolš bujny «ekanamičny i sacyjalny ŭron budzie ŭ śviecie, jaki raźvivajecca, dzie vysoki ŭzrovień niefarmalnaj ekanomiki, syravinnyja tavary i turyzm źjaŭlajucca asnoŭnymi krynicami zamiežnaj valuty, a finansavajeja prastora skavanaja haroj daŭhoŭ».
Pa prahnozach JUNKTAD, «ad 90 da 120 młn čałaviek u krainach, što raźvivajucca, buduć vymušanyja žyć va ŭmovach krajniaj halečy, a kala 300 młn sutyknucca z prablemaj adsutnaści charčovaj biaśpieki». Jak ličać aŭtary dakładu, asabliva mocna moža paciarpieć Łacinskaja Amieryka, dzie padzieńnie vytvorčaści sioleta čakajecca na ŭzroŭni 7,6%. U niekatorych krainach, u pryvatnaści ŭ Arhiencinie i Mieksicy, nie vyklučana skaračeńnie, jakoje vyličajecca dvuchznačnymi ličbami. Z hetym budzie kantrastavać situacyja va Uschodniaj Azii, dzie «rost zastaniecca ŭ stanoŭčaj zonie, choć i značna nižej, čym u 2019 hodzie». Tak, u Kitai ekśpierty prahnazujuć rost na 1,3%.
Zhodna z dakładam, «tolki dziakujučy śmiełaj metanakiravanaj biudžetnaj ekspansii, što ažyćciaŭlajecca pad kiraŭnictvam krain z raźvitaj ekanomikaj, moža być zabiaśpiečana spraviadlivaje i ŭstojlivaje adnaŭleńnie ekanomiki paśla pandemii». Na dumku JUNKTAD, «z ulikam abmiežavanaści vydatkaŭ u mnohich krainach, što raźvivajucca, spatrebicca značnaja mižnarodnaja padtrymka dla zabieśpiačeńnia im nieabchodnaj prastory dla manieŭru ŭ biudžetna-finansavaj śfiery». Akramia taho, jak ličać ekśpierty, «śviet pavinien vyrašyć prablemu hipierniaroŭnaści, kab paśpiachova adnavić hłabalnuju ekanomiku» paśla pandemii.
