Kala tysiačy čałaviek uziali ŭdzieł u Maršy spraviadlivaści ŭ Horadni 20 vieraśnia. Dziasiatki čałaviek zatrymali, u tym liku ciažarnuju žančynu na poźnim terminie i doktara historyi Alesia Smalenčuka, piša «Svaboda».
Marš pačaŭsia na Savieckaj vulicy. Sotni čałaviek ź bieł-čyrvona-biełymi ściahami sabralisia kala 14-j hadziny vakoł vuličnaha śpievaka ŭ łacinaamerykanskim stroi. Jamu plaskali, tancavali pad jahonyja śpievy, skandavali «Žyvie Biełaruś». Milicyjanty papiaredzili, što mierapryjemstva niedazvolenaje. Siarod pratestoŭcaŭ byli pažyłyja ludzi, rabotnik u formie «Hrodna Azot».
Urešcie kalona rušyła ŭ bok płoščy Lenina. Nieŭzabavie spyniłasia i paviarnuła ŭ advarotny bok, dzie ŭžo pierakryli šlach amapaŭcy. Tady pratestoŭcy paviarnuli z Savieckaj vulicy na vulicu Vialikuju Trajeckuju. Tam ruch rehulavaŭ supracoŭnik DAI i zavaročvaŭ usie mašyny na parkoŭku. Pratestoŭcy vyjšli na prajeznuju častku pierad tralejbusam i zaniali ŭvieś prajezd. U kancy vulicy ich užo čakali amapaŭcy.
Kalona spyniłasia. Ludzi praciahvali skandavać «Žyvie Biełaruś», «Heta naš horad», «Vierym, možam, pieramožam». Niekatoryja sprabavali abyści ačapleńnie dvarami.
Nieŭzabavie da pratestoŭcaŭ padjechali aŭtazaki, taniravanyja mikraaŭtobusy. Amapaŭcy pačali žorstka zatrymlivać ludziej.
Adnoj ź pieršych schapili ciažarnuju žančynu Vieraniku na 30-m tydni. Jana kryčała, što ciažarnaja, adnak jaje ciahnuli pa ziamli. Paźniej jana raskazała, što jaje pasadzili va aŭtazaku ŭ ciesnuju kamorku, tam nie chapała pavietra. Inšyja zastupilisia za jaje, kab joj dali padychać. Nieŭzabavie žančynu adpuścili.
Dvoje mužčyn, jakich nieśli ŭ aŭtazak za ruki i za nohi, vyhladali tak, nibyta stracili prytomnaść. Adnaho ź ich vyrašyli nie zatrymlivać, a prosta pakinuli na ziamli kala aŭtazakaŭ. Padyšli medyki z Čyrvonaha kryža, potym jaho zabrała chutkaja. Na vyhlad mužčynu było 35—40 hadoŭ. Potym jon ačuniaŭ i paśpieŭ skazać, što ŭ jaho zdaryŭsia hipertaničny kryz.
Adnaho z pratestoŭcaŭ, jaki stajaŭ asobna ad kalony i aburaŭsia zatrymańniami, schapiŭ načalnik horadzienskaha AMAPu Viktar Kraŭcevič u cyvilnym adzieńni i sam zaciahnuŭ u aŭtazak. Zatrymali taksama doktara historyi, prafesara Alesia Smalenčuka.
Usiaho schapili niekalki dziasiatkaŭ čałaviek.
Paśla hetaha kalona prykładna z sotni siłavikoŭ pačała adciaśniać pratestoŭcaŭ z centru. Ludzi razyšlisia. Paźniej haradzienca Ŭładzimiera Skołyšava vyciahnuli ź jahonaha aŭtamabila na vulicy Horkaha. Raźbili jamu vokny. Pryčyna zatrymańnia nieviadomaja.
Potym pratestoŭcy sprabavali damovicca ab novym miescy zboru, adnak milicejskaja technika, u tym liku vadamiot, źjaŭlałasia tam raniej za demanstrantaŭ.
Na miescy zatrymańniaŭ, jak zaŭždy, prysutničali namieśnik načalnika UUS Horadzienskaha abłvykankamu Vital Stasiukievič i načalnik horadzienskaha AMAPu Viktar Kraŭcevič.
Urešcie niekalki dziasiatkaŭ čałaviek pryjšli pad kinateatar «Kastryčnik». Da ich padjechali milicejskija aŭtobusy. Adnaho padletka zatrymali, bo jon admoviŭsia razblakavać telefon.
Svajaki zatrymanych čakajuć pad Leninskim RAUS.
