Rabotniki Minskaha elektratechničnaha zavoda imia Kazłova napisali kalektyŭny list, jaki nakiravali ŭ tym liku ŭ Saviet ministraŭ i Viarchoŭny sud. Padpisanty prosiać siarod inšaha spynić paŭnamoctvy Alaksandra Łukašenki, pravieści novyja vybary, vyzvalić palityčnych viaźniaŭ, a taksama spynić prymianieńnie siły ŭ dačynieńni da mirnaha nasielnictva. Pradstaŭniki METZ imia Kazłova, jakija źviarnulisia da ŭładaŭ, ličać minułyja prezidenckija vybary sfalsifikavanymi. Pad zvarotam padpisalisia kala 610 čałaviek, raspaviadajuć rabotniki, piša TUT.by.
Fota: Vadzima Zamiroŭskaha
Rabotniki raspaviadajuć, što podpisy pakidali pradstaŭniki roznych padraździaleńniaŭ pradpryjemstva.
— My vielmi zaniepakojenyja situacyjaj u našaj krainie, jakaja adbyvajecca z 9 žniŭnia paśla praviadzieńnia vybaraŭ prezidenta, — havorycca ŭ kalektyŭnym zvarocie. — My z bolem i škadavańniem nazirajem za padziejami, jakija z kožnym dniom pryvodziać da pavieličeńnia kolkaści paciarpiełych.
Padpisanty asudžajuć prymianieńnie siły da mirnych hramadzianaŭ z boku siłavikoŭ.
— Ličym nieprymalnym parušeńnie supracoŭnikami pravaachoŭnych orhanaŭ zakonu, jakoje vyjaŭlajecca ŭ štodzionnych, biespadstaŭnych zatrymańniach mirnych i biazzbrojnych hramadzian — u tym liku niepaŭnaletnich, na vulicach haradoŭ Biełarusi, — adznačajecca ŭ kalektyŭnym zvarocie. — Zatrymańni supravadžajucca ničym nie abhruntavanaj žorstkaściu i źbićciom hramadzian ludźmi, jakija prysiahali na viernaść narodu Biełarusi.
U kalektyŭnym liście havorycca, što padpisanty «nie pryznajuć vyniki prezidenckich vybaraŭ 9 žniŭnia i aficyjnyja ličby, ahučanyja CVK». Taksama adznačajecca, što Kanstytucyjaj kožnamu hramadzianinu harantujecca svaboda mierkavańniaŭ, pierakanańniaŭ i ich svabodnaje vykazvańnie.
Siarod patrabavańniaŭ padpisantaŭ:
— spynieńnie paŭnamoctvaŭ Alaksandra Łukašenki;
— pryznańnie prezidenckich vybaraŭ sfalsifikavanymi i niesapraŭdnymi, a taksama adstaŭka CVK u poŭnym składzie na čale ź Lidzijaj Jarmošynaj;
— pryciahnieńnie da adkaznaści ŭsich datyčnych da falsifikacyi padliku hałasoŭ na vybarach;
— praviadzieńnie novych vybaraŭ — «sumlennych, z prazrystym i zrazumiełym padlikam hałasoŭ»;
— spynieńnie prymianieńnia siły z boku siłavikoŭ u dačynieńni da mirnaha nasielnictva, a taksama aryštaŭ i zatrymańniaŭ;
— pryciahnieńnie da adkaznaści datyčnych da zatrymańniaŭ mirnych hramadzian i naniasieńnia im fizičnaj i psichałahičnaj škody;
— kampiensacyi materyjalnaha i maralnaha ŭronu ŭdzielnikam mirnych demanstracyj i aŭtaamataram;
— vyzvalić palityčnych viaźniaŭ.
U liście taksama prosiać «nie ažyćciaŭlać cisk i pieraśled pa palityčnych matyvach u dačynieńni da tych, chto padpisaŭ hety zvarot». List nakiravali siarod inšaha ŭ Saŭmin i Viarchoŭny sud, kiraŭniku «Biełprafmaša», Minabłvykankam, Minharvykankam, hiendyrektaru METCH imia Kazłova.