Alaksandr Łukašenka 17 vieraśnia. Fota Vadzima Zamiroŭskaha, TUT.by
«Padobna da taho, što śledam za pravavym defołtam (heta značyć niemahčymaściu dziaržavy vykonvać unutranyja abaviazacielstvy pa zabieśpiačeńni zakonnaści i pravaparadku) Biełaruś paśladoŭna i ŭpeŭniena ruchajecca da defołtu zamiežnapalityčnaha, — piša ŭ siabie ŭ fejsbuku palitołah, doktar palityčnych navuk Andrej Kazakievič.
— Nie spyniajučysia na pramiežkavych dasiahnieńniach (nakštałt žorstkaha razhonu pratestaŭ 9-12 žniŭnia), ułady, nie biez tvorčaha padychodu i dziŭnaj nastojlivaści, kožny tydzień stvarajuć novyja i novyja padziei ŭ hetym kirunku — razhrom… Kaardynacyjnaj rady, vysyłka palitykaŭ, zabarona na ŭjezd hramadzianam Biełarusi, novyja kryminalnyja spravy i mnohaje inšaje (nie kažučy ŭžo pra šmatlikija zajavy A. Łukašenki).
Rana ci pozna, takaja nastojlivaść pavinna była dać svaje vyniki. Mahčyma ciapierašni tydzień staŭ u hetym sensie pierałomnym.
Vielmi žorstkaja rezalucyja Jeŭrapiejskaha parłamienta (17.09), rašeńnie Viarchoŭnaj rady Ukrainy (16.09), abmierkavańnie Biełarusi ŭ niamieckim parłamiencie (16.09), nu i sustreča A. Łukašenki z U. Pucinym (14.09).
Usie padziei nielha nazvać spryjalnymi, a na zachodnim i paŭdniovym kirunku heta nahadvaje sapraŭdnuju zamiežnapalityčnuju katastrofu.
Viadoma, usio heta tolki nakidy budučaha padychodu da Biełarusi i mnohaje budzie zaležać ad dalejšych padziej, ale situacyja značna horšaja, čym była kali-niebudź u minułym. Nie padobnaja ni da 2011, ni navat da 1996 hadoŭ — tady, pa mienšaj miery, nie było prablem z Ukrainaj, a Rasija była hatovaja płacić i płacić šmat.
U rezalucyi Jeŭraparłamienta najbolšuju ŭvahu ŚMI pryciahvaje raździeł ab sankcyjach. Ale najbolš cikavym padajecca inšaje. Jeŭrapiejski parłamient zaklikaje «zamarozić lubyja srodki, jakija pieradajucca biełaruskamu ŭradu, a taksama pa prajektach, jakija realizujucca pad kantrolem dziaržavy», a taksama spynić kredytavańnie dziejučaj ułady praź Jeŭrapiejski inviestycyjny bank, Jeŭrapiejski bank rekanstrukcyi i raźvićcia dy inšyja miechanizmy.
Kali heta budzie realizavana na praktycy, jano paciahnie całkam realnyja značnyja finansavyja straty — sotni miljonaŭ ci navat miljardy jeŭra. Varta tolki ŭspomnić, što jašče viasnoj urad Biełarusi płanavaŭ pryciahnuć ad JEBRR kala 1 młrd jeŭra dla padtrymańnia ekanomiki va ŭmovach pandemii. Heta značyć sumu całkam paraŭnalnuju z pamieram rasijskaha kredytu. A jość jašče i biahučyja prajekty.
Jość, akramia inšaha, u rezalucyi abzac i pra BiełAES, jakuju ŭłady płanujuć zapuścić u listapadzie», — adznačaje Andrej Kazakievič.