Ihara Asanoviča pryciahnuli da adkaznaści pa artykule 23.34 «Parušeńnie paradku arhanizacyi abo praviadzieńnia masavych mierapryjemstvaŭ», piša «Rehijanalnaja hazieta».
55-hadovy były milicyjanier ciapier pracuje vartaŭnikom u vajskovaj čaści ŭ Krasnym, a žyvie ŭ Maładziečnie.
Pasiadžeńnie praviała sudździa Ina Kachanoŭskaja 15 vieraśnia.
Na pačatku pasiadžeńnia Asanovič chadajničaŭ ab tym, kab sud dazvoliŭ aznajomicca z materyjałami spravy, chadajnictva zadavolili. Paśla pierapynku Asanovič zaŭvažyŭ, što pratakoł aformleny z pamyłkaj. Miescam składańnia pratakoła paznačany horad Maładziečna, chacia milicyjaniery apytvali jaho pa miescy pracy ŭ Krasnym.
Na sudzie Asanovič zajaviŭ, što nie ŭdzielničaŭ u šeści, ale viedaje, što jano było, tamu što sam mužčyna žyvie ŭ domie, kala jakoha ŭdzielniki prachodzili. Taksama patłumačyŭ, što na videa zafiksavali nie jaho, a čałavieka, padobnaha da jaho. Pa mierkavańni Asanoviča, supracoŭniki milicyi jaho ahavorvali z-za taho, što raniej jon apaznaŭ na videazapisie sa źbićciom ludziej va ŭnutranym dvoryku RAUS dvuch ludziej z kiraŭnictva milicyi. «Ja ŭkazvaŭ ich proźviščy i asudžaŭ dziejańni», — zajaviŭ Asanovič.
Na pytańnie, jakim čynam jon moh apaznać milicyjanieraŭ, mužčyna patłumačyŭ:
— Ja vieteran, piensijanier Ministerstva ŭnutranych spraŭ, da 2007 hoda pracavaŭ u Maładziečanskim RAUS. Ad 2010 hoda atrymlivaju piensiju za vysłuhu hadoŭ.
Asanovič vykazaŭ mierkavańnie, što jaho ahavaryli pa rasparadžeńni kiraŭnictva. Na pytańnie suda, na čym hruntujecca mierkavańnie, adkazaŭ: «Na asabistym dośviedzie».
U jakaści śviedkaŭ byli troje milicyjanieraŭ Maładziečanskaha RAUS — Žalevič, Kušal i Murza. Žalevič zdymaŭ šeście na kamieru, Kušal vioŭ aŭtamabil. Jany skazali, što zaŭvažali Asanoviča ŭ natoŭpie, i toj pakazvaŭ nieprystojny žest.
Žalevič śćviardžaŭ, što čałaviek, padobny da Asanoviča, vykazvaŭsia ŭ bok milicyjanieraŭ. Jon zrazumieŭ heta pa ruchu vusnaŭ. Na videa, pradstaŭlenym milicyjaj, vidać, što mierkavany Asanovič byŭ u miedycynskaj mascy.
Kušal adznačyŭ, što bačyŭ čałavieka, padobnaha da Asanoviča, tolki na piešachodnym pierachodzie skryžavańnia Prytyckaha i Hramadoŭskaj.
Murza paśla ŭ adździele prahladaŭ videa. Chtości paznaŭ u čałavieku na videa Asanoviča. Tady źvieryli čałavieka na videa z pašpartnaj bazaj i vyrašyli, što heta jon.
Sud pastanaviŭ, što 30 žniŭnia dniom Asanovič prymaŭ udzieł u šeści i publična vykazvaŭ niezadavolenaść dziejučaj uładaj i paradkam praviadzieńnia vybaraŭ.
Na sudzie Asanovič vinu nie pryznaŭ. Sud pastanaviŭ nakłaści na Asanoviča administracyjnaje spahnańnie ŭ vyhladzie štrafu ŭ pamiery 25 bazavych vieličyń, što składaje 675 rubloŭ.
Pierad sudovym pasiadžeńniem Ihar Asanovič pakazaŭ žurnalistam paśviedčańnie ab uznaharodžvańni pamiatnym nahrudnym znakam «100 hod Kryminalnamu vyšuku Minskaj vobłaści Ministerstva ŭnutranych spraŭ Respubliki Biełaruś», zaćvierdžanaje zahadam ad 7 žniŭnia 2018 hoda.
