Jeŭraparłamient bolšaściu hałasoŭ na siońniašnim pasiadžeńni padtrymaŭ rezalucyju, jakaja zaklikaje struktury Jeŭrapiejskaha sajuza ŭvieści žorstkija sankcyi suprać pradstaŭnikoŭ uładaŭ Biełarusi.
Jeŭrapiejskija parłamientaryi prahałasavali za pryniaćcie prajekta rezalucyi, u jakoj nie pryznajucca vyniki vybaraŭ 9 žniŭnia, jakija, jak skazana ŭ dakumiencie, prajšli z hrubymi parušeńniami mižnarodnych standartaŭ. Taksama rezalucyja kaža pra niepryznańnie Alaksandra Łukašenki prezidentam Biełarusi paśla zakančeńnia jaho ciapierašniaha terminu.
U rezalucyi vitajecca dziejnaść Kaardynacyjnaj rady na čale sa Śviatłanaj Cichanoŭskaj, nazvanaj «pierachodnym pradstaŭnictvam naroda» i adkrytaj da dyjałohu z usimi palityčnymi i hramadskimi siłami. Rezalucyja zaklikaje kiraŭnictva ES akazvać sadziejničańnie radzie, a taksama patrabuje nieadkładnaha vyzvaleńnia jaje členaŭ, jakija znachodziacca pad vartaj.
U pryniataj rezalucyi havorycca, što Jeŭraparłamient padtrymlivaje narod Biełarusi i jaho zakliki da praviadzieńnia svabodnych i sumlennych vybaraŭ, a taksama ličyć nieabchodnym urehulavać kryzis mirnym šlacham pry padtrymcy niezaležnych ŚMI i pradstaŭnikoŭ hramadzianskaj supolnaści. Dakumient zaklikaje nieadkładna vyzvalić palitviaźniaŭ i ŭsich asob, jakija padvierhlisia advolnym zatrymańniam i znachodziacca zaraz pad vartaj, a taksama pravieści niezaležnaje rasśledavańnie ŭsich vypadkaŭ katavańniaŭ i źviazanaj z pratestami hibieli ludziej.
Taksama parłamientaryi zaklikajuć kiraŭnictva ES i krain, jakija ŭvachodziać u sajuz, raspracoŭvać kropkavyja sankcyi ŭ dačynieńni da tych, chto niasie adkaznaść za hvałt siłavikoŭ u dačynieńni da mirnych hramadzian, a taksama falsifikacyju vybaraŭ, u tym liku ŭ dačynieńni da Alaksandra Łukašenki, a taksama niekatorych hramadzian Rasii, jakija akazvajuć padtrymku biełaruskamu režymu.
Dakumient zaklikaje admovicca ad finansavaj padtrymki biełaruskaha režymu, u tym liku kredytavańnia pa linii Jeŭrapiejskaha inviestycyjnaha banka i Jeŭrapiejskaha banka rekanstrukcyi i raźvićcia, adnačasova z hetym padtrymlivajučy pravaabaroncaŭ, aktyvistaŭ i pradstaŭnikoŭ hramadzianskaj supolnaści Biełarusi. Taksama ŭ rezalucyi zaklikajuć padtrymać hramadzian našaj krainy, jakija źviartajucca za schoviščam ŭ ES, studentaŭ, adličanych z VNU za aktyŭnuju hramadzianskuju pazicyju.
Pryniataja rezalucyja adnosicca da razradu «niezakanadaŭčych», jana nosić rekamiendacyjny charaktar, nieabaviazkovaja da vykanańnia instytutami ES i ŭradami dziaržaŭ-členaŭ, ale słužyć dla ich palityčnym aryjenciram.
