Pra heta palitviazień paviedamiŭ u liście, jaki dasłaŭ z-za krataŭ žurnalistcy «Novaha času».
Palitviaźnia vadzili na pieršy i pakul što apošni dopyt (jon admoviŭsia davać pakazańni). Jon zhadaŭ, što ŭ toj dzień prachodziŭ mima kamiery, u jakoj 22 hady tamu, u 1998-m hodzie, pakajaŭsia i pryniaŭ Chrysta.
«Tamu hetuju «kamandziroŭku» ŭsprymaju jak maršrut u duchu apostała Paŭła — dla malitvy, śviedčańnia i napisańnia praciahu «Biełarusalima»», — zaznačaje Pavieł Sieviaryniec.
Nahadajem, pakul jon za kratami, vyjšła druhaja častka hetaha ramanu. Palityk piša, što na Vaładarcy čytaje «Novy Čas», akramia taho, paru razoŭ na tydzień «moŭčki vydajuć» «Sovietskuju Biełoruśsiju»».
Jon raspaviadaje, čym zajmajecca, pakul znachodzicca pad śledstvam: molicca, piša, adkazvaje na listy — pakul atrymaŭ ich kala 20. Palityk zaznačaje, što nastroj u jaho badziory, stan zdaroŭja narmalny: žonka Volha pieradała leki, bo paśla karcaru na Akreścina zapalilisia sustavy. Ciapier Pavieł Sieviaryniec papraviŭsia.
Ad Śledčaha kamiteta palitviazień atrymaŭ adkazy na svaje zvaroty ab sustrečy sa śviatarom. «Dla dazvołu spatkańniaŭ «niama pryčyn», i dla admovy sustrečy sa śviatarom «niama pryčyn», ale pakolki tut karancin, śviatara pakul nie budzie». Ale palityk nie hublaje badzioraści duchu i zaklikaje vieryć i spadziavacca. Jon pierakanany, što ŭsio budzie dobra, bo ŭ Biełarusi dziejničaje Boh. «Spraviadlivaść, praŭda, svaboda stanuć normaj žyćcia — bo chłuśnia, ździek i hvałt normaj być nie mohuć», — piša Pavieł Sieviaryniec.
Nahadajem, Paŭła Sieviarynca zatrymali bolš jak try miesiacy tamu, 7 červienia, padčas pikieta pa zbory podpisaŭ za alternatyŭnych kandydataŭ na pasadu prezidenta Biełarusi.
Z hetaha času palityk znachodziŭsia ŭ izalatary na Akreścina, dzie jamu dadavali ŭsio novyja administracyjnyja aryšty. Amal uvieś čas jon pravioŭ u karcary. 20 žniŭnia stała viadoma, što na Sieviarynca zaviedziena kryminalnaja sprava, jaho abvinavačvajuć pavodle č.2 art.293 Kryminalnaha kodeksa (masavyja biesparadki).
Listy Paŭłu Sieviaryncu možna pisać na adras: SIZA №1, vuł. Vaładarskaha,2, Minsk, 220050.
