Hałoŭnyja kampanii Biełarusi praciahvajuć nazapašvać vielizarnyja daŭhi. U 2020 hodzie hety praces tolki paskoryŭsia, piša banki24.by. Na 1 žniŭnia sukupnyja zapazyčanaści bujnych i siarednich pradpryjemstvaŭ krainy skłali 148,4 młrd BYN. Pavodle studzieńskaha prahnozu Minekanomiki VUP Biełarusi za hod moža skłaści 143,5 młrd BYN. Takim čynam, daŭhi kampanij-fłahmanaŭ užo ciapier bolšyja za pamier ekanomiki.
Z pačatku hoda sumarnyja daŭhi pavialičylisia na 11,7%. Pry hetym za ŭvieś 2019 hod rost składaŭ 7,4%, za 2018-y — 10,7%.
Siarod zapazyčanaściaŭ kampanij šmat valutnych kredytaŭ i pazyk. Atrymlivajecca, što za košt devalvacyi rubla abaviazalnictvy pradpryjemstvaŭ rastuć značna chutčej, čym raniej. U žniŭni «zajčyk» znoŭ abiasceniŭsia da košyka valut Nacbanka. Tamu na 1 vieraśnia chutčej za ŭsio budzie pabity histaryčny rekord pa sumie zapazyčanaści.
Sumarnyja zapazyčanaści — heta suma abaviazalnictvaŭ pa kredytach i pazykach i kredytorki. Pazyki ŭ kredytach i pazykach na 1 žniŭnia skłali 90,1 młrd BYN (+15%), kredytorka — 58,3 młrd BYN (+7%). U terytaryjalnym razrezie bolš za ŭsio zapazyčyli arhanizacyi Minska (41,7 młrd BYN).
Amal pałovu zapazyčanaściaŭ krainy na 1 vieraśnia kancentravali pradpryjemstvy pramysłovaści (71,3 młrd BYN), u tym liku hornazdabyŭnoj — 2,6 młrd BYN, apracoŭčaj — 63,2 młrd BYN, enierhietyki — 5,2 młrd BYN. Sumarnyja daŭhi pramysłovaści z pačatku hoda pavialičylisia na 9,6%.
Siarod halin apracoŭčaj pramysłovaści pa abjomie doŭhu lidziravali charčpram (11,6 młrd BYN), drevaapracoŭka i celułoźniki (9,8 młrd BYN), a taksama mašynabudavańnie (7,6 młrd BYN). Za miežami pramysłovaści istotnyja abaviazalnictvy mieli sielskaja haspadarka (15 młrd BYN), budaŭnictva (18,6 młrd BYN), handal (17,4 młrd BYN).
