«My źviartajemsia da ŭsich cyvilizavanych krain, dla jakich čałaviečaje žyćcio i hodnaść źjaŭlajucca biassprečnymi kaštoŭnaściami, što lažać u padmurkach sacyjalnaha žyćcia. Vy na ŭłasnym dośviedzie viedajecie, što mienavita hetyja padstavovyja kaštoŭnaści dazvalajuć vašym hramadstvam raźvivacca. Na pryznańni hetych kaštoŭnaściaŭ budujecca palityčnaje žyćcio ŭ vašych krainach, jakim by supiarečlivym i kanfliktnym jano ni było. Pryncypy spraviadlivaści i viaršenstva zakonu taksama abapirajucca na pryznańnie biezumoŭnaj kaštoŭnaści čałaviečaha žyćcia i hodnaści.
Biełaruś — jeŭrapiejskaja kraina, narod jakoj siońnia adkryta i samaaddana vystupiŭ za abaronu žyćcia i hodnaści hramadzian suprać aŭtarytarnaha režymu, jaki pakazaŭ usiamu śvietu, što jon hatovy adstojvać svaju ŭładu ŭ krainie luboj canoj. Naš pratest nakiravany suprać palityčnaha ładu, pry jakim dapuščalnyja biezzakonnyja pieraśledy, źbićcio, katavańni i fizičnaje źniščeńnie niavinnych ludziej. Dziejučaja ŭłada na čale z Alaksandram Łukašenkam siońnia paśladoŭna realizuje mienavita takuju palityku, demanstratyŭna ihnarujučy jak normy biełaruskaj Kanstytucyi, tak i mižnarodnyja pahadnieńni, jakija datyčacca vykanańnia pravoŭ čałavieka».
«My ŭpeŭnienyja, biełaruskaje hramadctva hatovaje samastojna vyrašać budučyniu svajoj krainy i spadziajemsia na vaša sadziejničańnie ŭ inicyjavańni pieramoŭnaha pracesu pamiž Kaardynacyjnaj radaj i z pradstaŭnikami dziejnaj ułady. Tolki mirnyja pieramovy zmohuć viarnuć krainu ŭ rečyšča zakonnaści i prychilnaści humanistyčnym kaštoŭnaściam», — havorycca ŭ zvarocie.
Aŭtary zvarotu pieraličvajuć patrabavańni: spynieńnie hvałtu, vyzvaleńnie palitviaźniaŭ i novyja prezidenckija vybary.
Zvarot adkryty dla podpisu, pad im užo padpisalisia Śviatłana Aleksijevič, Alaksiej Andrejeŭ, Alhierd Bacharevič, Julija Cimafiejeva, Dźmitryj Strocaŭ, Taćciana Niadbaj, Siarhiej Chareŭski, Ihar Łohvinaŭ, Iryna Ramanava, Taćciana Ščytcova, Taćciana Badałažskaja, Rusłan Baškievič, Hanna Sieviaryniec, Uładzimir Mackievič.
