Ministerstva justycyi Biełarusi nahadała ab administracyjnaj adkaznaści dla arhanizataraŭ i ŭdzielnikaŭ niezarehistravanych fondaŭ u padtrymku pratestoŭcaŭ. Pra heta havorycca na aficyjnym sajcie viedamstva.
Jak havorycca ŭ paviedamleńni Miniustycyi, u apošni čas u ŚMI i internecie źjaŭlajecca ŭsio bolš infarmacyi ab fondach, jakija źbirajuć srodki dla «asob, jakija ŭdzielničajuć u niezakonnych masavych mierapryjemstvach i inšych publičnych akcyjach».
Jak paviedamlajecca, zhodna ź dziejučym u Biełarusi zakanadaŭstvam, takija fondy pavinny prachodzić abaviazkovuju dziaržaŭnuju rehistracyju. U advarotnym vypadku ich arhanizacyja i ŭdzieł u ich dziejnaści padpadajuć pad artykuł 23.88 Kodeksa ab administracyjnych pravaparušeńniach (Niezakonnyja arhanizacyja dziejnaści hramadskaha abjadnańnia, relihijnaj arhanizacyi abo fondu albo ŭdzieł u ich dziejnaści). Pa dadzienym artykule maksimalnaje pakarańnie praduhledžana ŭ vyhladzie štrafu ŭ pamiery da 50 bazavych vieličyń (1350 rubloŭ), a pad udziełam u dziejnaści Fondu ŭ joj razumiejucca dziejańni, nakiravanyja na dasiahnieńnie jaho metaŭ, u tym liku vyznačanych u statutnych i inšych dakumientach.
Ministerstva justycyi padkreślivaje, što ŭ niezarehistravanych fondach niama miechanizmaŭ finansavaj prazrystaści i mahčymaści adsačyć vykarystańnie hrošaj, jakija pastupili, dziakujučy čamu ludzi, jakija zajmajucca zboram i raźmierkavańniem srodkaŭ, mohuć niezakonna ŭzbahačacca.
