9 vieraśnia Ministerstva infarmacyi vyniesła čarhovaje papiaredžańnie TAA «TUT BAJ MIEDYJA» — za artykuł «Da redaktara TUT.BY pryjšli siłaviki. Na jaje dačku zaviali kryminalnuju spravu ab masavych biesparadkach».
U liście Mininfarmacyi havorycca, što ŭ dačynieńni da Valeryi Ułasik kryminalnaja sprava nie raspačynałasia, a pieratrus pravodziŭsia «u metach pravierki infarmacyi ab datyčnaści jaje da arhanizacyi masavych biesparadkaŭ, jakija adbyvajucca na terytoryi horada Minska».
Asoby, jakija pradjavili Halinie i Valeryi Ułasik pastanovu na pieratrus, zajavili, što Valeryja padazrajecca ŭ ździajśnieńni kryminalnaha złačynstva pa artykule 293 KK RB «Masavyja biesparadki».
Toje ž samaje paśpieła skazać Valeryja žurnalistam, kali sadziłasia ŭ mašynu, na jakoj jaje pavieźli ŭ RUUS.
Na praciahu dnia 8 vieraśnia žurnalisty TUT.BY nieadnarazova sprabavali ŭdakładnić status Valeryi ŭ Śledčym kamitecie, adnak tam situacyju tak i nie rastłumačyli. Zatoje ŭ Ministerstva infarmacyi, jak bačym, źviestki nakiravali.
Papiaredniaje papiaredžańnie TAA «TUT BAJ MIEDYJA» atrymała 7 vieraśnia, jašče adno — 7 žniŭnia. U adpaviednaści z Zakonam ab ŚMI, u vypadku vyniasieńnia ŭładalniku sietkavaha vydańnia dvuch i bolš piśmovych papiaredžańniaŭ na praciahu hoda dostup da sietkavaha vydańnia moža być abmiežavany. Rašeńnie ab hetym prymaje Mininfarm.
