U navinach na BT-1 vyjšaŭ siužet pra akcyju ŭ padtrymku Alaksandra Łukašenki, što adbyłasia viečaram 8 vieraśnia. Adzin z «nieabyjakavych biełarusaŭ» akazaŭsia hramadzianinam Rasii, adznačaje reform.by.
Niekalki dziasiatkaŭ čałaviek pad čyrvona-zialonym ściaham, a taksama pad čyrvonymi i čorna-aranžavymi ściahami NOD prajšli viečaram ad płoščy Pieramohi da płoščy Niezaležnaści. Milicyja nijak nie pieraškadžała šeściu.
Adnym z hierojaŭ repartažu staŭ mužčyna z barodkaj.
«Voś ja kažu, što takija ludzi, jakija manipulujuca zachodnimi kanałami, tełehramami, za ŭsio dobraje, suprać usiaho drennaha. Ale heta prosta hłupstva i bałbatnia. A kali pakapacca hłybiej — ja jeździŭ da ich na mitynhi apazicyjnyja. Pytaŭsia ŭ ich «A što vy chočacie?» Jany kažuć «A my nie viedajem, my prosta pryjšli za kachańnie, za mir». Tak? A što za hetym chavajecca, niezrazumieła. Łukašenka daŭ svabodu takuju, jakuju nie daŭ nichto ŭ śviecie svabodu. A jany chočuć jašče bolšuju svabodu. Jakuju, jany sami nie razumiejuć», — raspavioŭ na kamieru mužčyna.
Mužčyna — hramadzianin Rasii i nie maje nijakaha dačynieńnia da našaj krainy. Jaho zavuć Anton Tarasaŭ, jon žyvie ŭ Maskvie, źjaŭlajecca siabram KPRF i navat sprabavaŭ stać deputatam Dziarždumy Rasii. Ciapier viadzie błoh na Youtube.
Tarasaŭ u svaim fejsbuku nie chavaje, što byŭ na mitynhu i davaŭ kamientar BT: «Skazana było mnoha, pakinuli heta», — piša jon.
Tarasaŭ, miarkujučy pa jaho sacyjalnych sietkach, znachodzicca ŭ Biełarusi jak minimum z 19 žniŭnia. Jon udzielničaŭ u akcyjach za Łukašenku ŭ Navapołacku.
