Maryja i jaje chłopiec atrymali ciažkija traŭmy ad vykarystańnia specsrodkaŭ. Ranicaj ich abaich zabrali ŭ Śledčy kamitet, piša «Radyjo Svaboda».
Žycharka Miensku Maryja mocna paciarpieła padčas razhonu akcyi pratestu ŭviečary 9 žniŭnia kala Steły. Pobač ź joj i jaje chłopcam vybuchnuła śviatłašumavaja hranata, jany byli adnymi ź pieršych paranienych udzielnikaŭ mitynhu. U tuju ž noč Maryju źmiaścili ŭ Vajskovy špital, dzie jana znachodziłasia da kanca žniŭnia.
Ranicaj 7 vieraśnia dadomu da paciarpiełaj pryjšli śledčyja.
«Ciapier idzie pieratrus pa miescy rehistracyi dački, — skazała «Svabodzie» maci Maryi Alena. — Jaje vypisali z Vajskovaha špitala kala tydnia tamu, a chłopiec tolki ŭ minułuju piatnicu vyjšaŭ. U jaho vielmi žorstkija traŭmy, siońnia treba było iści na pieraviazku da lekara. A ich ranicaj, a pałovie na vośmuju, zabrali ŭ SK.
Chłopiec dahetul u śledčym adździele, jaho dapytvajuć, a dačku dapytali i pravodziać pieratrus. Nakolki razumieju, heta sprava ab masavych biesparadkach, z dačkoj ciapier razam advakat prysutničaje. Padrabiaznaści pakul nieviadomyja».
Pa słovach žančyny, i dačku, i jaje chłopca ŭžo dapytvali padčas lačeńnia ŭ Vajskovym špitali. Tady śledčych cikavili akaličnaści atrymańnia traŭmaŭ.
