Alaksandr Vasilevič, jaki vałodaje rekłamnym ahienctvam Vondel / Hepta, halerejaj sučasnaha mastactva «Ŭ», sajtami kyky.org i The Village Biełaruś, byŭ zatrymany 27 žniŭnia. Ciapier jon znachodzicca ŭ SIZA №1 na vulicy Vaładarskaha, jak akazałasia, pa kryminalnaj spravie prachodzić i jaho žonka Nadzieja Zielankova. Žančyna na siomym miesiacy ciažarnaści, piša Tut.by.
Fota: kyky.org
— Siońnia Alaksandru vystavili abvinavačańnie, miera strymańnia zastajecca raniejšaj — źniavoleńnie pad vartaj. Było padadziena chadajnictva ab źmienie miery strymańnia, čakajem adkaz, — kamientuje advakat Alena Dzianis. U jaje, jak i inšych udzielnikaŭ, uziataja padpiska ab nievydavańni, tamu daviedacca artykuł Kryminalnaha kodeksa, jaki staviać u vinu Alaksandru Vasileviču, niemahčyma. — Moj padabaronny adčuvaje siabie dobra, šmat čytaje, zajmajecca sportam, nakolki heta mahčyma ŭ tych umovach, i pieradaje ŭsim pryvitańnie. Viadoma, Alaksandr pieražyvaje za svoj biznes i hatovy siabie abaraniać. Pišycie jamu listy, heta vielmi važna! Heta takaja padtrymka, jakaja daje zrazumieć: čałaviek nie zabyty, pra jaho pamiatajuć. 14 vieraśnia ŭ Alaksandra dzień naradžeńnia, užo ciapier jamu možna adpravić vinšavańnie.
