Fota Nadziei Bužan
2 vieraśnia adbyłasia sustreča inicyjatyŭnaj hrupy z deputatam Aleham Hajdukievičam nakont inicyjatyvy pa jaho adklikańni. Deputat skazaŭ, što nie baicca pracedury, a taksama zajaviŭ, što nie pakinuŭ biez razhladu nivodnaha zvarotu hramadzian pa faktach hvałtu ŭ dačynieńni da pratestujučych i źviarnuŭsia z adpaviednymi zapytami ŭ pravaachoŭnyja orhany, piša Tut.by.
Hajdukievič padkreśliŭ, što nakiravaŭ u MUS i Śledčy kamitet zapyty pa ŭsich faktach zvarotu da jaho vybarščykaŭ, «kab jany nieadkładna pryniali rašeńnie i razabralisia».
Jon upeŭnieny, što ciapier treba rabić bolš.
— My pavinny stvaryć kamisiju ŭ parłamiencie i raźbiracca ŭ hetym pytańni z udziełam zacikaŭlenych asob.
Deputat taksama prakamientavaŭ fakt adsutnaści kryminalnych spraŭ, źviazanych ź cialesnymi paškodžańniami ŭdzielnikam akcyj pratestu, u tym liku tych, jakija pryviali da śmierci.
— Liču, što ciapier my pavinny dačakacca vynikaŭ pravierki, jakuju viadzie mižviedamasnaja kamisija, — adznačyŭ Hajdukievič, pahadziŭšysia, što pa fakcie hvałtu spravy ŭsio-taki treba pačynać.
Jon taksama prakamientavaŭ infarmacyju pra šmatlikija falsifikacyi na minułych prezidenckich vybarach.
— Ja jak partyja 10 hadoŭ kažu, što treba mianiać vybarčaje zakanadaŭstva i vybary pavinny iści pa partyjnych śpisach.
Hajdukievič dadaŭ, što atrymanyja im paviedamleńni ab parušeńniach na vybarach adpraviŭ, jak i naležyć, u CVK. Pry hetym deputat pierakanany, što Śviatłana Cichanoŭskaja vybary nie vyjhrała.
Hajdukievič pryznaŭ, što jaho žonka, vykładčyk johi, prapłakała try dni paśla taho, jak ubačyła, što rabiłasia ŭ krainie paśla 9 žniŭnia, a niekatoryja siabry vyjšli na pieršy niadzielny marš pratestu nie za apazicyju, a suprać hvałtu.
— I što, heta ŭsio vorahi? Ale ja suprać taho, kab los krainy vyrašaŭsia na vulicy, — padkreśliŭ Hajdukievič.
