U Viciebsku kala hałoŭnaha korpusa akademii vieterynarnaj miedycyny 2 vieraśnia vystraiŭsia łancuh salidarnaści. U im stajała kala 30 studentaŭ. Nieŭzabavie paśla pačatku akcyi maładych ludziej razahnała milicyja. Dvuch chłopcaŭ zatrymali, piša Tut.by.
Akcyja pratestu prachodziła biez łozunhaŭ, płakataŭ i ściahoŭ. Studenty moŭčki stajali ŭzdoŭž vulicy 1-j Davatara kala hałoŭnaha korpusa vietakademii.
Milicyja znachodziłasia kala VDAVM jašče da taho, jak studenty stali ŭ łancuh. Kali jany stali ŭzdoŭž vulicy, adzin z supracoŭnikaŭ paviedamiŭ u miehafon, što heta «niesankcyjanavanaje mierapryjemstva».
Spačatku milicyjanier chacieŭ zatrymać chłopca z čerapam na majcy, ale toj uchiliŭsia. Tady zabrali maładoha čałavieka pa susiedstvie ŭ «łancuhu» — jon u čyrvonaj bajcy.
Praź niekalki chvilin z łancuha «vyrvali» adnaho chłopca i zaviali ŭ mašynu. Studenty paśla hetaha razyšlisia.
Pobač ź vietakademijaj zastałasia stajać hrupa chłopcaŭ. Milicyjanier zrabiŭ sprobu zatrymać adnaho ź ich. Student vyrvaŭsia, adnak jaho dahnali i zabrali ŭ RAUS.
