Pra heta napisaŭ u svaim fejsbuku doktar Andrej Bituška.
«Siońnia ŭ Žytkavičach buduć sudzić maju kalehu — vydatnaha piedyjatra, cudoŭnuju maci, sapraŭdnuju intelihientku, niastomnaha zmahara sa złom — spadaryniu Irynu Ciškoŭskuju. Za «ŭdzieł u niesankcyjanavanym mierapryjemstvie», — napisaŭ jon.
«Jana maje stać šostaj asobaj u Žytkavičach (dzie žyvie 16 tysiač čałaviek), asudžanaj z hetaj nahody.
Doktar Ciškoŭskaja — adna z samych daśviedčanych piedyjatraŭ u horadzie i rajonie. Kali maje pieršyja pacyjenty ciapier tolki skančvajuć škołu i stvarajuć siemji, to da jaje pieršyja pacyjenty pačynajuć pryvodzić svaich unukaŭ.
Viedajecie, heta nievierahodnaje adčuvańnie, jakoje ja pieražyŭ, pryjechaŭšy adnojčy ŭ Žytkavičy, kali ty idzieš pa horadzie z kalehaj, a ź joj vitajecca kožny pieršy čałaviek. Takija asoby, jak spadarynia Iryna, zakłali padmurak našaha siońniašniaha abudžeńnia. Bo nikoli nie mirylisia sa złom i zaŭždy trymalisia praŭdy. Zaŭždy trymalisia čałaviečnaści.
Svajo pierabyvańnie na Akreścina ja nazyvaju «vandroŭkaj u śviet žyvioł». Nie tamu, što ja chaču abrazić tych, chto mnie jaje zładziŭ, a tamu što heta miesca ŭ toj čas stałasia polusam antyčałaviečnaści, miescam, dzie imknulisia mianie prymusić zabycca na toje, što ja lekar, kandydat navuk, što ja čałaviek, pieraŭtvaryć mianie ŭ žyviołu, jakaja tolki i robić, što baicca za svajo žyćcio i zdaroŭje. Akreścina tady — heta kancentrat zła, ale ŭ štodzionnym žyćci jano prysutničaje, jak praviła, u bolš razbaŭlenych formach.
I časam abaročvajecca farmalna ŭ byccam by pravavyja vobrazy, jak učorašnija zatrymańni studentaŭ za «niesankcyjanavanaje šeście» abo siońniašni sud nad kalehaj za toje ž samaje.
Ale najčaściej zło i chłuśnia chavajecca za takimi zvykłymi dla nas formułami: «Vy žie sami vsio ponimajetie» abo «My žie vsiehda tak diełali». I za našym stracham, našym kampramisam z sumleńniem i abyjakavaściu.
Zmahańnie z hetym złom u štodzionnaści kožnaha — vielmi składanaja zadača, prykład paśpiachovaha vyrašeńnia jakoj daje nam učastkovy piedyjatr Žytkavickaj rajonnaj palikliniki doktar Iryna Ciškoŭskaja. Ja vielmi spadziajusia, što paśla ŭsiaho, što my pieražyli, pieražyvajem i pieražyviem, my vypracujem tryvały imunitet da zła, chłuśni i abyjakavaści ŭ našaj štodzionnaści. A taksama staniem darosłaj nacyjaj na svajoj ziamli. Ale pakul «eto nie točno».
Sud nad doktaram Ciškoŭskaj adbyŭsia 2 vieraśnia.
Spadarynie Irynie dali 5 bazavych (135 rubloŭ)
