Fota Nadziei Bužan
Śviatłana Cichanoŭskaja zajaviła ŭ svaim novym zvarocie, što pazityŭna hladzić na inicyjatyvu Viktara Babaryki stvaryć svaju partyju. Adnak adznačyła, što nie zhodnaja ź niekatorymi idejami. Zvarot eks-kandydata ŭ prezidenty byŭ apublikavany ŭ tielehram-kanale «Puł pieršaj».
Cichanoŭskaja nahadvaje, što hałoŭnaja meta siońnia — damahčysia vykanańnia patrabavańniaŭ hramadzian Biełarusi i pravieści novyja sumlennyja vybary. Mienavita z hetaj pryčyny tysiačy ludziej z 9 žniŭnia vychodziać na vulicy.
Ich hałoŭnyja patrabavańni: Łukašenka pavinien syści sa svajoj pasady, palitviaźni pavinny być vyzvalenyja, a vinavatyja ŭ represijach — pryciahnutyja da adkaznaści.
— Stvoranaja pa majoj inicyjatyvie Kaardynacyjnaja rada zaklikana sadziejničać mirnamu tranzitu ŭłady i praviadzieńniu pieramoŭ ab vychadzie z palityčnaha kryzisu šlacham praviadzieńnia novych vybaraŭ. U Kaardynacyjnuju radu ŭvajšli aŭtarytetnyja ludzi roznych prafiesij, roznych palityčnych pohladaŭ. U im niama i nie pavinna być daminavańnia jakoj-niebudź palityčnaj partyi. Siabraŭ Kaardynacyjnaj rady abjadnoŭvaje hałoŭnaja meta — nieabchodnaść viarnuć uładu narodu — zajaŭlaje Śviatłana Cichanoŭskaja.
Jana adznačaje, što stvareńnie novych palityčnych partyj — prykmieta imknieńnia da demakratyi, tamu pazityŭna aceńvaje inicyjatyvu Viktara Babaryki stvaryć svaju partyju.
— Razam z tym, ja pačuła ŭ zajavie štaba Viktara Babaryka dva śćviardžeńni, ź jakimi kateharyčna nie zhodnaja.
Pa-pieršaje, ja kateharyčna nie zhodnaja sa śćviardžeńniem, što na vybarach my nie zmahli pieramahčy. Usie viedajuć, što heta nie tak. My pieramahli, ale našu pieramohu sprabujuć skraści.
Mienavita tamu ludzi vyjšli na masavy pratest, mienavita tamu pačalisia zabastoŭki, mienavita tamu pratestuje ŭsio naša hramadstva — ad studentaŭ da piensijanieraŭ, ad spartsmienaŭ da pradprymalnikaŭ.
Pa-druhoje, ja nie zhodnaja, što pieršaja zadača, jakaja staić pierad nami — heta kanstytucyjnaja reforma. Takaja pastanoŭka mety nie adpaviadaje patrabavańniam biełaruskaha naroda, i vyhladaje dvuchsensoŭnaj, bo siońnia Łukašenka sprabuje adciahnuć svoj sychod, viedučy razmovu pra niezrazumiełuju kanstytucyjnuju reformu ŭ niavyznačanyja terminy, — piša Cichanoŭskaja.
Na dumku eks-kandydata ŭ prezidenty, «namier padać u bližejšy čas dakumienty na rehistracyju partyi aznačaje hatoŭnaść padmianić temu źmieny ŭłady hatoŭnaściu prasić va ŭłady sankcyi na stvareńnie partyi».
Jana adznačaje, što Viktar Babaryka zapisaŭ svoj zvarot da aryštu, ale aŭtary zajavy pavinny adkazna padychodzić da pryniaćcia palityčnych rašeńniaŭ.
— Nie treba padmianiać palityčny paradak šlacham pierachodu da abmierkavańnia kanstytucyjnaj reformy. Zaklikaju pačuć toje, što kaža narod. Spačatku — patrabavańni hramadzian, potym — reformy, jakija mahčymyja tolki paśla sumlennych vybaraŭ.
Dumaju, paśla novych prezidenckich vybaraŭ nam varta było b zachavać adzinstva i stvaryć šyroki hramadski ruch z udziełam usich zacikaŭlenych partyj i hramadzian. Taki ruch dapamoh by raźvićciu našaj krainy, — zajaviła Cichanoŭskaja.
Nahadajem, napiaredadni stała viadoma, što Maryja Kaleśnikava i siabry štaba Viktara Babaryka stvarajuć palityčnuju partyju «Razam».
