Fota Vitala Palinieŭskaha
1 vieraśnia arcybiskup Tadevuš Kandrusievič, jakomu napiaredadni pahraničnyja słužby Respubliki Biełaruś nie dazvolili viarnucca na Radzimu, ź Biełastoka źviartajecca da ŭsioj pastvy Katalickaha Kaścioła ŭ Biełarusi. Zvarot drukuje catholic.by.
Ulubionyja ŭ Chryście biskupy, śviatary, kansekravanyja asoby, braty i siostry, ludzi dobraj voli!
31 žniŭnia 2020 hoda padčas pierasiačeńnia miažy na pahraničnym pierachodzie Kuźnica Biełastockaja — Bruzhi biez usialakich tłumačeńniaŭ mnie było admoŭlena ŭ viartańni ŭ Biełaruś, choć pahraničniki pavodzili siabie vielmi karektna.
Takoje rašeńnie pahraničnych słužbaŭ mnie jak hramadzianinu Respubliki Biełaruś absalutna niezrazumieła, bo zakon Respubliki Biełaruś № 49-3 ad 20 vieraśnia 2009 h. «Pra paradak vyjezdu z Respubliki Biełaruś i ŭjezdu ŭ Respubliku Biełaruś hramadzianaŭ Respubliki Biełaruś» u artykule 3 «Prava hramadzianaŭ na vyjezd z Respubliki Biełaruś i ŭjezd u Respubliku Biełaruś» vyznačaje nastupnaje: «Prava hramadzianina na ŭjezd u Respubliku Biełaruś nie moža być abmiežavana».
Zabarona na ŭjezd u Respubliku Biełaruś pieraškadžaje mnie jak Ardynaryju Minska-Mahiloŭskaj archidyjacezii i Staršyni Kanfierencyi Katalickich Biskupaŭ u Biełarusi ŭ ažyćciaŭleńni pastyrskaha słužeńnia i ŭdziełu ŭ zapłanavanych kaścielnych mierapryjemstvach.
Va ŭmovach hramadska-palityčnaha kryzisu, jaki ŭ ciapierašni čas pieražyvaje naša Baćkaŭščyna, ja zaklikaŭ i praciahvaju zaklikać da dyjałohu i prymireńnia. Mnie zusim nie chočacca, kab nieabhruntavanaje i biezzakonnaje rašeńnie pahraničnaj słužby pavialičvała napružanaść u našaj krainie.
Ja źviarnuŭsia ŭ Dziaržaŭny pahraničny kamitet Respubliki Biełaruś z prośbaj rastłumačyć hetuju situacyju i admianić rašeńnie ab zabaronie majho viartańnia na Radzimu dla vykanańnia maich pastyrskich abaviazkaŭ
Spadziajusia, što heta tolki prykraje nieparazumieńnie, jakoje ŭ samy karotki termin budzie vypraŭlena.
Da vas, darahija braty ŭ biskupskim i śviatarskim słužeńni, kansekravanyja asoby, vierniki i ludzi dobraj voli, ja źviartajusia z prośbaj ab malitvie ŭ intencyi majho chutčejšaha viartańnia na Radzimu i mirnaha vyrašeńnia vostraha hramadska-palityčnaha kryzisu ŭ našaj Baćkaŭščynie.
Daručajučy ŭsich vas Maci Božaj i niabiesnamu zastupniku Biełarusi śviatomu Archaniołu Michału, ja ad usiaho serca błahasłaŭlaju vas u imia Ajca i Syna, i Ducha Cviatoha.
