31 žniŭnia ŭ Homli sudzili aktyvista AHP, pensijanera MUS Uładzimiera Niapomniaščych, jaki ŭdzielničaŭ u zbory podpisaŭ za svajo vyłučeńnie na vybarach prezydenta Biełarusi. Jaho abvinavacili pavodle artykułu 23.34 KaAP. Milicyja skłała try pratakoły, piša Radyjo Svaboda.
7 žniŭnia sud pakaraŭ Niapomniaščych aryštam na 15 sodniaŭ. 25 žniŭnia jaho znoŭ zatrymała milicyja. 26 žniŭnia sud prysudziŭ jamu štraf 810 rubloŭ nibyta za ŭdzieł u niesankcyjanavanym masavym mierapryjemstvie. Z sudu aktyvista nie adpuścili, a znoŭ zavieźli ŭ izalatar časovaha ŭtrymańnia.
31 žniŭnia sudździa Alesia Osipava (sud Centralnaha rajonu) razhladała try pratakoły milicyi na Niapomniaščych. Sudździa admoviła, kab milicyjant Arciom Žaŭniak, jaki składaŭ pratakoły, byŭ śviedkam, bo jon «zacikaŭlenaja asoba».
Svajoj viny va ŭdziele ŭ niesankcyjanavanych schodach Uładzimier Niapomniaščych nie pryznaŭ.
«Mianie navat za vušy nie pryciahnieš da hetych spravaŭ! U pratakole napisana, što miesca i čas niesankcyjanavanaha schodu byli damoŭlenyja. Z kim damoŭlenyja čas i miesca? U spravie jak dokaz jość zdymak, što ja staju la cyrku i razhladaju vystavu dziciačych malunkaŭ! Pryčym tut niesankcyjanavany schod? Navat na zdymku milicyi vidać, što ja staju adzin i vakoł niama ludziej! Ja hladzieŭ dziciačyja karciny, atrymlivaŭ asałodu, nu ciapier budu siadzieć», — zajaviŭ na sudzie aktyvist.
Taksama Niapomniaščych abvinavacili ŭ tym, što jon z hrupaj hramadzian padavaŭ kalektyŭnuju skarhu ŭ Śledčy kamitet na milicejski hvałt. Pad zajavaj padpisalisia bolš za 800 žycharoŭ Homla. Milicyja vyrašyła, što heta byŭ niesankcyjanavany schod.
«U Homli zabili (padčas paślavybarčych akcyj pratestu) Alaksandra Vichora. Ja byŭ na jaho pachavańni. Moža, i pachavańnie — heta niesankcyjanavany schod? A dzie ŭ zakonie zapisana, što zajavu ŭ SK moža padavać tolki adzin čałaviek?», — pytajecca pensijaner MUS.
Treciaje abvinavačańnie ŭ tym, što jon zanosiŭ razam ź inšymi hramadzianami kalektyŭnuju zajavu ŭ Centralny RAUS. I heta milicyja acaniła jak «niesankcyjanavany schod».
«Pryznańnie — karaleva dokazaŭ, kazaŭ Vyšynski ŭ 30-ch hadach. A tut navat pryznańnia majho niama, i mianie sudziać pa niejkaj poŭnaj łuchcie! Tut niama ničoha na mianie, choć by zdymak sa ściaham pryčapili da spravy ź minułaha hodu», — zajaviŭ aktyvist.
Sudździa Alesia Osipava pakarała Ŭładzimiera Niapomniaščych aryštam na 10 sodniaŭ.
