U Babrujsku zatrymali aktyvista strajkama «Biełšyny» Vitala Kraśnickaha. Siońnia, 28 žniŭnia, kala 16.30 u kvateru da maładoha čałavieka pryjšli dvoje mužčyn u spartyŭnych kaściumach i prapanavali «prajechać dla razmovy». Jon admoviŭsia, praŭda potym zhadziŭsia «prosta prahulacca i pahavaryć». Kala UUS Babrujskaha harvykankama na vulicy Minskaj Vitalu załamali ruki i zaviali ŭ budynak milicyi, piša Tut.by.
Vital Kraśnicki — druhi sprava.
Doma razam ź Vitalom Kraśnickim znachodziŭsia jaho stryječny brat Uładzisłaŭ:
— Vital śpiarša admaŭlaŭsia jechać, spasyłajučysia na toje, što chaj jaho dla razmovy vyklikajuć pozvaj. Tady mužčyny skazali, što ŭžyvuć suprać jaho fizičnuju siłu. Jany nie pradstaŭlalisia i dakumienty nie pakazvali.
U vyniku Vital i Uładzisłaŭ vyjšli na vulicu i ŭbačyli ŭ dvary mikraaŭtobus biez numaroŭ, kudy im prapanavali sieści.
— Naturalna, my admovilisia. Tady nam prapanavali prahulacca i prosta pahavaryć. Navat skazali, što možna ŭsio zapisvać i zdymać na kamieru.
U vyniku maładyja ludzi ŭ supravadžeńni dvuch mužčyn dajšli da budynka UUS Babrujskaha harvykankama na vulicy Minskaj, adkul, pa słovach Uładzisłava, vyjšaŭ namieśnik načalnika Andrej Małachaŭ i paviedamiŭ, što Vital Kraśnicki zatrymany.
— Bratu tut ža załamali ruki i paviali ŭ budynak, ja paśpieŭ adbiehčy, — paviedamiŭ małady čałaviek.