My, biełaruskija ekskursavody, hidy, pierakładčyki, arhanizatary vandrovak, pracaŭniki śfiery turyzmu rezka asudžajem hvałt, jaki adbyvajecca zaraz na vulicach biełaruskich haradoŭ.
Naša rabota — adkryvać Biełaruś. I my robim heta ź vializnym zadavalnieńniem. Biełaruś — pryhožaja, hodnaja, spakojnaja kraina, a jaje narod nie prymaje hvałt dla vyrašeńnia kanfliktaŭ. Voś što my sprabujem davieści pra Biełaruś i zamiežnikam, i našym turystam.
Usie my šmat hadoŭ pracavali nad tym, kab vybudoŭvać imidž Biełarusi jak pryhožaj, utulnaj i samaj biaśpiečnaj krainy Jeŭropy. I naša dziejnaść była paśpiachovaj — turystyčnaja halina źjaŭlajecca adnoj z samych dynamičnych u biełaruskaj ekanomicy.
Ale paśla 9 žniŭnia naša rabota akazałasia pad pahrozaj. I vyklikana heta ŭ pieršuju čarhu nieapraŭdanaj žorstkaściu słužbaŭ MUS u adnosinach nie tolki da mirnych demanstrantaŭ, ale i da zvyčajnych žycharoŭ i zamiežnych turystaŭ. Nieadekvatnaje vykarystańnie śpiecsrodkaŭ, palavańnie na ludziej u dvarach damoŭ, źbićcio zatrymanych. Takoje nie pavinna adbyvacca ŭ Biełarusi!
My salidaryzujemsia z tymi ŭstanovami, jakija abviaścili zabastoŭki, kab jak maha chutčej spynić hety hvałt i pieraśled mirnych žycharoŭ. Na žal, my sami nie možam abvieścić zabastoŭku, bo našaha miesca pracy — spakojnaj i miralubnaj Biełarusi — ciapier niama!
Turystyčny patok z Polščy i Rasii ŭžo ciapier mocna źniziŭsia z-za dziejańniaŭ siłavych viedamstvaŭ (biespadstaŭnaha zatrymańnia hramadzian hetych krain). A hetyja, bazavyja dla nas kirunki ŭjaznoha turyzmu, jaki tolki pačynaŭ adnaŭlacca paśla karanavirusa.
My zaklikajem MUS RB spynić cisk na hramadzian Biełarusi, jakija prosta chočuć adstajać svajo prava na spraviadlivyja vybary. Patrabujem nie ŭžyvać hvałt i katavańni da zatrymanych mirnych biełarusaŭ, a taksama pryciahnuć da adkaznaści tych, chto dapuściŭ takija dziejańni.
My źviartajemsia da ŭsich dziaržaŭnych struktur, adkaznych za kulturny imidž Biełarusi, turystyčnuju śfieru, a taksama da pradstaŭnikoŭ siłavych viedamstvaŭ: Ci razumiejecie vy, što kali my znoŭ pačniom vadzić ekskursii pa ŭsioj Biełarusi, to ŭ Chatyni, Małym Traściancy i Kurapatach u nas i ŭ našych turystaŭ ciapier buduć uźnikać zusim inšyja asacyjacyi? Dziela čaho vy viartać zło na našu ziamlu?!
Spyniciesia! Davajcie jak maha chutčej vierniem u našu krainu mir i zakonnaść, kab my, pradstaŭniki biełaruskaha turbiznesu, znoŭ zmahli pryvozić turystaŭ u pryhožuju i spakojnuju Biełaruś!
