23 žniŭnia ŭviečary z Akreścina vyjšaŭ adzin z apošnich zatrymanych paśla vybaraŭ — hramadzianin Rasiei Michaił Darožkin, jakoha rodnyja i konsuły šukali 10 dzion. Vyjšaŭ sa štampam ab departacyi i zabaronie ŭjezdu ŭ Biełaruś na 5 hadoŭ, piša Radyjo Svaboda.
Michaił Darožkin 8 žniŭnia pryjechaŭ u Miensk. Jon daŭno žyvie ŭ Sankt-Pieciarburzie, maje rasiejskaje hramadzianstva, pracuje ŭ IT-sfery. Rodam ź Biełarusi, baćki žyvuć u Voršy, brat Pavał — u Miensku.
Pakolki avija- i čyhunačnyja znosiny pamiž Rasiejaj i Biełaruśsiu časova prypynili praz karanavirus, Michaiłu daviałosia jechać aŭtobusam z Sankt-Pieciarburhu ŭ Miensk. Spyniŭsia ŭ siabroŭ. Dva dni hulaŭ pa horadzie jak turyst, u fejsbuku paśpieŭ vystavić fota i videa — staŭ śviedkam zatrymańnia skiejtbardysta 8 žniŭnia kala metro «Kastryčnickaja».
Uviečary 9 žniŭnia vypraviŭsia na čyhunačny vakzał, kab dajechać da Voršy, dzie žyvuć jaho baćki.
«Na pustoj vulicy Leninhradzkaj prykładna a 21.30 stajała ačapleńnie milicyi. Ja jaho sfatahrafavaŭ. Da mianie padyšli milicyjanty i skazali, što darma ja heta zrabiŭ. Heta byli kursanty, jany padviali mianie da mikraaŭtobusa ciomna-srabrystaha koleru biez numaroŭ. U im byli čatyry bajcy AMAPa i para čałaviek u cyvilnym.
Ja pakazaŭ dakumenty, što ja hramadzianin Rasiei, što maju kvitok da Voršy, pakazaŭ paśviedčańnie ab naradžeńni — naradziŭsia ŭ Voršy, fota pašparta baćki, što jon žyvie ŭ Voršy. Mnie skazali: «Tabie vielmi pašancavała, vydali z telefona fota i videa i idzi na ciahnik»», — raskazaŭ Michaił.
«U Kastryčnickim RUUS było jak ŭ kino pra nacystaŭ. Na Akreścina — 33 čałavieki ŭ kamery»
Darožkina adpuścili, i małady čałaviek pajšoŭ u bok vakzału. Ale litaralna praz 30 sekund siłaviki schamianulisia i zabrali jaho ŭ toj ža busik, załamali ruki za śpinu, nadzieli kajdanki i pavieźli ŭ Kastryčnickaje RUUS. Tam skłali dva pratakoły: adzin — što jon čaplaŭsia da minakoŭ, i druhi — što akazvaŭ supraciŭ milicyi.
«Supracoŭniki milicyi skazali mnie: «My ŭsio razumiejem, pišy, što ty nia zhodny, i dalej usio narmalna, budziem raźbiracca. I na sudzie daduć štraf i ŭsio».
U dvary Kastryčnickaha RUUS było jak u kino pra nacystaŭ: nam vielmi mocna ściahnuli ruki, navat milicyjanty potym skazali, kab tak nie rabili — bo try dni nie prachodzili ślady. Potym pryvieźli ŭ dvor izalataru časovaha ŭtrymańnia. Tam stajali takija ž chłopcy ŭ kamuflažy ŭnutranych vojskaŭ, u rukach — dručki. Usich bili.
11 žniŭnia mianie ź siamiu sukamernikami pieraviali ŭ kameru, dzie byli ŭžo 25 čałaviek. To bok nas u kamery pamieram 2,2 na 5,3 metra apynułasia 33! A tam ža jašče tumbački, paraša, umyvalnik. Było vielmi horača, na voknach — vada, łaźnia! U kamery nasuprać nas čałaviek zapatrabavaŭ tualetnaj papiery i myła — jaha 12 razoŭ udaryli dubinkaj pa śpinie», — kaža Michaił.
Try dni aryštantaŭ naahuł nie karmili. Paścielnaj bializny spačatku nie było, jaje vydali tolki praz 5 dzion, kali ludziej pačali masava vypuskać.
«Ludziej pastavili na kaleni i prymusili śpiavać dziaržaŭny himn Biełarusi»
Michaił apaviadaje, što asabista jaho amal nia bili, prosta pašancavała. Ale ŭva ŭsich čatyroch kamerach, praź jakija jon prajšoŭ za dva tydni, ludziej źbivali žorstka.
«Ja asabista bačyŭ i čuŭ, jak bili siem socień čałaviek. Prykładna z druhoj nočy da šostaj adnaho chłopca ŭdaryli 50 razoŭ humavaj dubinkaj pa śpinie. Ranicaj ludziej i ź IČU, i ź CIP vyvodzili va ŭnutrany dvor CIP i praciahvali žorstka bić.
Samaje strašnaje vidovišča było na druhuju noč: ludzi stajali na kaleniach, ich prymusili śpiavać dziaržaŭny himn Biełarusi i žorstka źbivali — pa žyvacie, pa śpinie, pa nahach», — apaviadaje pieciarburski prahramist.
Konsuła da hramadzianina Rasiei dapuścili na 10-y dzień źniavoleńnia
Ani svajakam, ani siabram Darožkina nie paviedamlali, dzie jon znachodzicca. Jahonaja žonka ŭ Sankt-Pieciarburzie źviarnułasia ŭ biełaruskaje konsulstva, baćka — u ambasadu Rasiejskaj Federacyi ŭ Miensku. Rasiejski konsuł u Miensku abjeździŭ čatyry izalatary, jeździŭ u Žodzina, i paŭsiul kazali, što rasiejca Darožkina tam niama.
«Ja trapiŭ u niejkuju špijonskuju historyju: mianie chavali ad konsułaŭ. Konsułaŭ, jakija pryjechali siońnia pa mianie pry vyzvaleńni, ja pabačyŭ prykładna na 10-y dzień. Pryčym jany prychodzili štodnia, štodnia ź izalataru vyvodzili hramadzian Rasiei. Usich davoli chutka vyzvalili. Ja zastaŭsia adzin. I tolki ŭ minuły čaćvier, na 10-y dzień ja sustreŭsia z rasiejskim konsułam. Jon naahuł dumaŭ, što ja lažu dzieści ŭ sutareńniach źbity i mianie bajacca im pakazać», — raskazaŭ Michaił.
Konsuła da rasiejskaha hramadzianina Darožkina dapuścili tolki 20 žniŭnia. Paśla taho, jak jahony brat Pavał znajšoŭ Michaiła ŭ śpisach na Akreścina.
«Ukraincaŭ bili vielmi žorstka: nibyta «jany pryvieźli siudy Majdan»
Paśla druhoha sudu hramadzianina Rasiei pieraviali ŭ kameru, dzie zastalisia 4 čałavieki nieasudžanyja, a ŭsich astatnich pavieźli ŭ Žodzinskuju turmu. Michaiła taksama źbiralisia pieravieźci ŭ Žodzina.
«Mnie pašancavała: trapiŭ na adnaho ź niešmatlikich adekvatnych supracoŭnikaŭ va ŭsim CIPie. Ja jamu patłumačyŭ, što ja hramadzianin Rasiei. I jon skazaŭ, kab ź mianie źniali dva prysudy i pieraviali ŭ kameru ź inšaziemcami.
Tam byli chłopcy z Švajcaryi, Tureččyny, Polščy, Turkmenistanu, Tadžykistanu, pa pary rasiejcaŭ i ŭkraincaŭ z Danbasu. Ukraincaŭ bili vielmi žorstka: nibyta «jany pryvieźli siudy Majdan». U adnaho było voka, zapłyłaje kryvioju, u druhoha pierabityja nohi, i jon 4 dni nia moh stajać. Im usim supracoŭnica AHiM vypisała štrafy ŭ 30 bazavych. Inšaziemcaŭ adpuścili. A mnie ŭ pašpart pastavili štamp ab terminovaj departacyi».
Na nastupny dzień znoŭ źjaviłasia supracoŭnica AHiM, jakaja paviedamiła, što Darožkina vypuściać na volu 23 žniŭnia a 21.30, a litaralna praz 2,5 hadziny, apoŭnačy 24 žniŭnia jon pavinien pakinuć terytoryju Respubliki Biełarusi. I ciaham 5 hadoŭ nia maje prava naviedvać svaju radzimu.
Z Akreścina Darožkina sustrakali brat Pavał i supracoŭniki ambasady RF u Biełarusi. Jany adrazu ž nakiravalisia ŭ bok miažy, kab paśpieć da poŭnačy davieźci Michaiła da Smalensku. U aŭtorak ranicaj Darožkin daść pres-kanferencyju na Maskoŭskim vakzale Sankt-Pieciarburhu.
Ciapier u CIP na Akreścina znachodziacca kala 20 čałaviek, paviedamiŭ Michaił Darožkin.
