Supracoŭniki Kupałaŭskaha teatra vystupili z čarhovaj zajavaj. Pryvodzim jaje całkam.
«Siońnia adbyłasia sustreča supracoŭnikaŭ teatra, dzie my abmierkavali situacyju nie tolki ŭ teatry, ale i ŭ krainie.
My ŭpeŭnilisia ŭ razumieńni taho, što my — adzinaje cełaje.
Pazicyja, jakuju zaniaŭ Kupałaŭski teatr, nie źmianiłasia. My paćviardžajem svoj namier syści z teatra ŭ vypadku nievykanańnia zajaŭlenych patrabavańniaŭ.
Na dadzieny momant technična padača zajaŭ ab zvalnieńni niemahčyma praz adsutnaść dostupu ŭ teatr. Aficyjna teatr adpraŭleny na prastoj, i nie va ŭsich jość mahčymaść trapić u budynak.
Dahetul vykonvajučy abaviazki dyrektara teatra nie byŭ pradstaŭleny kalektyvu. Pavodle papiaredniaj infarmacyi, jon hatovy sustrecca z nami 25 žniŭnia, dzie ŭ jaho budzie mahčymaść asabista aznajomicca z kožnaj zajavaj.
My admaŭlajemsia ad indyvidualnych sustreč ź dziejnym vykonvajučym abaviazki dyrektara. Usie nieabchodnyja pytańni pavinny vyrašacca ŭ prysutnaści ŭsiaho kalektyvu.
Na dadzieny momant my jasna razumiejem, što viartańnie Paŭła Paŭłaviča Łatuški na pasadu dyrektara teatra niemahčymaje ŭžo praź niezaležnyja ad nas pryčyny.
PATRABAVAŃNI NACYJANALNAHA AKADEMIČNAHA TEATRA IMIA JANKI KUPAŁY
My, supracoŭniki Nacyjanalnaha akademičnaha teatra imia Janki Kupały, patrabujem:
1. Vyzvalić usich palitźniavolenych i zatrymanych padčas vybarčaj kampanii i mirnych akcyj, źviazanych ź joj.
2. Rasśledvać usie vypadki hvałtu nad pratestoŭcami i vypadkovymi ludźmi. Uzbudzić kryminalnyja spravy ŭ dačynieńni da siłavikoŭ, jakija złoŭžyvali svaimi paŭnamoctvami.
3. Dapuścić pradstaŭnikoŭ srodkaŭ masavaj infarmacyi, advakataŭ i miedykaŭ da tych, chto jašče ŭtrymlivajecca ŭ izalatarach.
4. Spynić cisk na supracoŭnikaŭ, jakija prymajuć udzieł u mirnych akcyjach pratestu i vykazvajuć svaju hramadzianskuju pazicyju.
5. Pravieści novyja vybary prezidenta z novym składam CVK z dopuskam niezaležnych mižnarodnych i nacyjanalnych naziralnikaŭ», — havorycca ŭ zajavie.
