Vitalu Procharavu 17 hadoŭ. 11 žniŭnia chłopca zatrymali, kali jon išoŭ uviečary dadomu z trenirovačnaj placoŭki. Pra źbićcio syna siłavikami «Našaj Nivie» raskazaŭ ajčym junaka Ivan.
«U nas u Žłobinie jość trenirovačnaja placoŭka. Tut katajucca na rovarach, samakatach, truki vučacca rabić. Vital uviečary viartaŭsia dadomu adzin z hetaj placoŭki. Prykładna ŭ 22.30 mima jaho prajazdžaŭ bieły bus. Spyniŭsia, ź jaho vybiehli ludzi ŭ bałakłavach.
Vitala pavalili, źbili, pryvieźli va ŭčastak, adviali ŭ niejki padvał, pryviazali da kresła. Dźvie hadziny ździekavalisia ź jaho. Vučyli jaho žyć, abražali, kazali, što pasadziać na tysiaču hadoŭ. Pryviazany, jon atrymaŭ z kułaka ŭ voka. Usia śpina ŭ śladach ad dubinak, nohi ŭ ranach, padbitaje voka, huzy na hałavie, hiematomy pa ŭsim ciele. Na abiedźvie nahi kulhaje.
Paśla dźviuch hadzin ździekaŭ mnie patelefanavali, skazali zabirać dzicia. Kali ja pryjšoŭ, sa mnoj admovilisia hutaryć. Skazali spytać u dziciaci, za što jaho zatrymali. Sami byli ŭ maskach. Darečy, skrali čachoł ad telefona i panamu.
Na syna skłali pratakoł za ŭdzieł u niesankcyjanavanym mierapryjemstvie. U telefonie maładziona znajšli videa, jakoje Vital zapisaŭ za paru dzion da zatrymańnia. Na im siłaviki stralajuć u ludziej humovymi kulami. Ja pamiataju, jon jašče tady telefanavaŭ mnie, prasiŭ zabrać, kazaŭ, što jamu strašna.
Ślady ad pabojaŭ my tut ža paśla vyzvaleńnia syna aformili ŭ śledčych: źjeździli na miesca zatrymańnia, prajšli miedekśpiertyzu.
U Žłobinie ciapier u nas takich źbitych dziaciej piać čałaviek. Samamu mienšamu ŭsiaho 12 hadoŭ».
