Fota Nadziei Bužan
Kalektyŭ Kupałaŭskaha teatra zapatrabavaŭ spynić hvałt da mirnych hramadzian i vystupiŭ za pieralik hałasoŭ z udziełam niezaležnych naziralnikaŭ. Zvarot padtrymali kala 200 supracoŭnikaŭ teatra.
— My patrabujem ad usich siłavych struktur nieadkładna spynić hvałt adnosna mirnych hramadzian, jakija majuć zakonnaje kanstytucyjnaje prava na svabodu zboraŭ i vykazvańnia svaich mierkavańniaŭ. Advolnyja zatrymańni biez tłumačeńnia pryčyn i ničym nie vytłumačalnaja žorstkaść źjaŭlajucca pramym parušeńniem zakonu.
Kalektyŭ Kupałaŭskaha ličyć, što jość mnostva padstaŭ nie daviarać vynikam hałasavańnia, ahučanych CVK. Tamu vystupaje za mirny dyjałoh i pieralik hałasoŭ.
— U dadzieny momant źniać napružańnie dapamoh by prosty krok: adkryty i prazrysty pieralik hałasoŭ z udziełam niezaležnych naziralnikaŭ, pradstaŭnikoŭ usich kandydataŭ u prezidenty i hramadskaści.
Kupałaŭcy zaklikali ŭłady vyzvalić usich zatrymanych.
— My prypyniajem pakaz śpiektaklaŭ da vyrašeńnia isnujučaj situacyi i inicyjujem praceduru abviaščeńnia zabastoŭki. Vielmi spadziajomsia na mirnaje vyrašeńnie situacyi i na toje, što rozum i zakon u našaj krainie pieramohuć.
Siezon u Kupałaŭskim teatry pavinien byŭ adkrycca 21 žniŭnia premjeraj śpiektakla «En souvenir de Šahał», pryśviečany mastaku Marku Šahału.