Kandydat na pasadu prezidenta Śviatłana Cichanoŭskaja razam ź siabrami svajho štaba praciahvaje turne pa haradach krainy. Siońnia ŭ raskładzie kamandy było 2 harady: Słuck i Salihorsk. Adnak miascovyja ŭłady razam ź milicyjaj spačatku sarvali mitynh u Słucku, a potym i ŭ Salihorsku.
U Salihorsku mierapryjemstva pavinna było pačacca ŭ 19:30 (stadyjon «Budaŭnik», vuł. Leninskaha kamsamoła, 51).
Adnak jano, jak i ŭ Słucku, nie adbudziecca. Pra heta paviedamiła pradstaŭnica štaba Volha Kavalkova. Znoŭ praviadzieńniu mierapryjemstva pieraškodzili kamunalnyja pracy.
Niahledziačy na heta, kala 400 čałaviek sabralisia kala stadyjona. Tady pačalisia zatrymańni.
Milicyja ŭhavorvaje ludziej razychodzicca. «Kali łaska, ja vas prašu», — kaža siłavik.
Pierymietr stadyjona patruluje namieśnik načalnika Salihorskaha RAUS Siarhiej Sałaviej.
Z dvuch bakoŭ darohi stajać kala 500 čałaviek. Pieryjadyčna pierachodziać z boku na bok. Milicyja pierakryła prajezd, papiaredžvaje pra niezakonnaść.
Žančyna ŭ natoŭpie vykrykvaje: «Łukašenka, hańba!» Jaje padtrymlivajuć apładysmientami.
«Pieršaje papiaredžańnie. U dalejšym budziem prymianiać fizičnuju siłu!» — papiaredžvaje ludziej milicyjant.
«Milicyja z narodam», — u adkaz jamu kryčyć natoŭp.
Milicyja ŭ miehafon prosić razyścisia, ale mašyny, sihnalačy, zahłušajuć jaje.
«Vam nie soramna?» — «Kali b vy siadzieli ŭ aŭtazaku, mnie było b soramna».
Źjaviŭsia AMAP. Ludzi razychodziacca.
«Začyščajem usich ludziej, chto staić», — addaje kamandu namieśnik načalnika salihorskaj milicyi Sałaviej.
Zatrymali padletka i mužčynu, jaki kryčaŭ «Hańba!».
U padletka amapaŭcy praviarali mabilnik ci dakumienty. Čałaviek biez formy, jaki čakaŭ u mašynie, zakryčaŭ: «Dy biarycie jaho».
Padbieh niechta ŭ cyvilnym, schapiŭ padletka za šyju i paciahnuŭ.
