Jak stała viadoma pravaabaroncam, 31 lipienia dla adbyćcia raniej vyniesienych administracyjnych aryštaŭ zatrymlivajuć aktyvistaŭ u Minsku, Oršy, Navapołacku i inšych haradach krainy.
Orša
Tak, viadoma, što dla adbyćcia 15-sutkavaha aryštu ŭ Oršy byŭ zatrymany administratar telehram-kanału «Orša dla žyćcia» Alaksandr Andrejeŭ.
Taksama siońnia asudzili na 25 bazavych vieličyń štrafu Kaciarynu Harelikavu, a prosta z suda ŭ IČU zabrali Hienadzia Łaryjonava. Jon byŭ asudžany na 15 sutak aryštu jašče 26 červienia.
Taksama siońnia sud adbyŭsia i nad Vadzimam Kaporykavym. Jaho sudziŭ Mikałaj Drahunoŭ, jaki pryznačyŭ mužčynie pakarańnie ŭ 12 sutak aryštu.
Viadoma, što za kratami znachodzicca i Michaił Čamuraka. Jon adbyvaje 10 sutak aryštu, pryznačanych sudom 27 lipienia.
A 28 lipienia byŭ zatrymany i asudžany na 15 sutak aryštu Illa Cichanaŭ. U toj dzień jon na svajoj mašynie musiŭ vieźci davieranych asobaŭ Śviatłany Cichanoŭskaj na pikiet u Tałačyn.
Navapołack
U Navapołacku zabrali z doma Andreja Zujeva dla adbyćcia administracyjnaha aryštu ŭ 14 sutak. Mužčynie pahražali, što sacyjalnaja słužba pryjdzie dla pravierki ŭmoŭ pražyvańnia jaho małych dziaciej.
Na 14 sutak taksama zabrali i Artura Siniehu prosta z pracy — zavoda Naftan.
Minsk
Telehram-kanał «Jeŭrapiejskaj Biełarusi» paviedamlaje ab aryšcie ich aktyvista Jaŭhiena Afnahiela. U dadzieny momant aktyvist znachodzicca ŭ CIP na Akreścina. Mierkavana jon adbyvaje 15-sutačny aryšt za pikiet pa zbory podpisaŭ za alternatyŭnych kandydataŭ, jaki prachodziŭ na Kamaroŭskim rynku. Pry jakich abstavinach i dzie Jaŭhien Afnahiel byŭ zatrymany, nieviadoma.
Taksama adbyvać raniej prysudžanyja 15 sutak aryštu zabrali aktyvista Maksima Viniarskaha.
Brest
U Breście jašče 28 lipienia byŭ zatrymany Andrej Šarenda, siońnia jaho dastavili ŭ sud. Jaho vinavaciać pa art. 23.34 KaAP za toje, što jon nibyta raźmiaściŭ zakliki da ŭdziełu ŭ niesankcyjanavanych masavych mierapryjemstvach ŭ telehram-kanale. 24 lipienia ŭ domie Andreja Šarendy adbyŭsia pieratrus, milicyja kanfiskavała ličbavyja nośbity i pryłady. U vyniku sud pakaraŭ Šarendu 15 sutkami aryštu za zaklik u internecie da ŭdziełu ŭ akcyi 14 lipienia.
Słuck
U Słucku ŭ druhoj pałovie dnia 31 lipienia byli zatrymanyja vałanciory «Krainy dla žyćcia» Šyłovič Arciom, Anisiejka Siarhiej i Jakubovič Uładzimir za razdaču pamiatak «Sumlennych ludziej».
Maładziečna
U 17:30 u Maładziečnie byli zatrymanyja žurnalisty «Biełsata» Źmicier Mickievič i Dzianis Dziuba, jakija viali pramy efir z ahitacyjnaha mitynhu Śviatłany Cichanoŭskaj. Milicyjanty nie patłumačyli pryčynu zatrymańnia i adrazu zahadali vyklučyć kamieru, paviedamlajecca na sajcie kanału. Taksama zatrymali žurnalistaŭ Maryju Arcybašavu i Alesia Siliča.
Lida
U Lidzie zatrymanyja žurnalisty «Biełsata» Halina Abakunčyk i Uładzimir Łunioŭ. Jany viali strym ź mitynhu Śviatłany Cichanoŭskaj u Lidzie.
