Mahčymuju druhuju chvalu karanavirusnaj infiekcyi ŭ Biełarusi čakajuć u listapadzie — śniežni. Pra heta 30 lipienia ŭ siaredniaj škole №3 u Hancavičach u Bresckaj vobłaści raspaviała namieśnik ministra achovy zdaroŭja Alena Bohdan, vystupajučy pierad vybarcami. Ciapier jana davieranaja asoba kandydata ŭ prezidenty Alaksandra Łukašenki, piša tut.by.
Adkazvajučy na adno z pytańniaŭ, Alena Bohdan raspaviała, što vypadki karanavirusa ŭ krainie pa-raniejšamu fiksujucca i sistema achovy zdaroŭja rychtujecca da mahčymaj druhoj chvali.
— Zhodna z raźlikami my čakajem mahčymuju druhuju chvalu karanavirusnaj infiekcyi ŭ listapadzie — śniežni, — adznačyła namieśnik ministra.
Śpiecyjalist raspaviała, jak mienavita sistema achovy zdaroŭja da jaje rychtujecca. Pa-pieršaje, papaŭniajucca zapasy indyvidualnych srodkaŭ abarony: ad reśpirataraŭ treciaha kłasa abarony da palčatak, jakija my zakuplajem u Małajzii.
Pa-druhoje, stvarajecca nieabchodny zapas lekaŭ.
— Z tym, što vyrablajecca ŭ krainie, u nas pytańniaŭ niama: antybijotyki zroblenyja, prostyja hieparyny zroblenyja (preparaty, jakija prymianiajucca dla praduchileńnia zhusalnaści kryvi. — Zaŭv. TUT.BY), srodki dla narkozu zroblenyja, haračkapanižalnyja zroblenyja, zapasy supraćhrypoznaha preparata my taksama zrabili, niahledziačy na toje, što jon nie dziejničaje na karanavirus.
Pa słovach śpiecyjalista, u nas dastatkovy zapas preparata dla lačeńnia malaryi — hidraksichłarachinu, taksama jość nizkamalekularnyja hieparyny — ich zakupili, niahledziačy na toje, što farmkampanii vystavili bolš vysokuju canu. Adnak pakul nie vyrašana pytańnie z antyvirusnym preparatam remdesivir.
— U nas uźnikaje pytańnie pa remdesiviru. ZŠA — aryhinatar (toj, chto vyrablaje), i jany vykupili 90% vytvorčaści remdesiviru da kanca hoda. Tamu siońnia naša zadača kupić dženieryk (preparat, jaki kapijuje aryhinał) i, samaje hałoŭnaje, na našych farmaceŭtyčnych pradpryjemstvach stvaryć choć kavałačak vytvorčaści.
Kliničnyja pratakoły pa lačeńni pacyjentaŭ z COVID-19 pakul mianiać nie buduć, tamu što jany, pa słovach namieśnika ministra, pracazdolnyja.
Alena Bohdan raspaviała, što, rychtujučysia da mahčymaj druhoj chvali, praciahvajecca rekanstrukcyja balnic, jakija buduć apornymi dla akazańnia dapamohi pacyjentam z karanavirusam. Tam u tym liku robiać dadatkovyja kropki kisłarodu. Padčas druhoj chvali miedyki buduć staracca ŭ pieršuju čarhu spravicca siłami terapieŭtyčnych adździaleńniaŭ.
Taksama ŭžo raspracavali elektronnuju sistemu manitorynhu zachvorvańniaŭ, i hetuju sistemu płanujuć ustalavać na addalenyja pracoŭnyja miescy, kab padčas druhoj chvali infarmacyju źbirali nie ŭručnuju, a była adzinaja sistema z addalenym dostupam.
— Jašče adna naša zadača — padrychtavacca nie tolki da druhoj chvali, ale i nie dapuścić cyrkulacyi siezonnaha virusa hrypu. Naša zadača ŭ vieraśni — kastryčniku pravieści vakcynacyju nasielnictva ad hrypu, — skazała Alena Bohdan.
Jana taksama adznačyła, što ŭ baraćbie z karanavirusnaj infiekcyjaj viasnoj-letam nam u tym liku dapamoh vialiki łožkavy fond u balnicach. Pavodle jaje słoŭ, u nas 10 łožkaŭ na 1 tysiaču nasielnictva. Taksama jana skazała, što ŭ krainie dahetul jość fielčarska-akušerskija punkty ŭ miescach, dzie pražyvajuć 130-150 čałaviek.
Pavodle źviestak Ministerstva achovy zdaroŭja na 30 lipienia, u krainie 67 665 vypadkaŭ COVID-19 z pačatku pandemii. Ačuniali 61 765 pacyjentaŭ, pamierli 553 čałavieki.
