Sudździa Łarysa Barel u sudzie Leninskaha rajona 17 lipienia prysudziła haradziencu Siarhieju Kałmykovu 30 bazavych vieličyń štrafu (810 rubloŭ) pa artykule 23.4 (Niepadparadkavańnie supracoŭniku milicyi). Pa inšym artykule, u jakim abvinavačvaŭsia hrodzieniec, 17.1 (Drobnaje chulihanstva), jaho apraŭdali, piša Hrodna.life.
Administracyjny praces u dačynieńni da Siarhieja Kałmykova pačaŭsia jašče 17 červienia. Śviedki — supracoŭniki AMAPa Siarhiej Kłyžuk i Aleh Łyčahin — raspaviali, što 29 maja Kałmykova zatrymlivali ŭ suviazi ź situacyjaj, jakaja adbyvajecca na Savieckaj płoščy. Spačatku ŭ sudzie jany tłumačyli, što Kałmykoŭ padaŭsia im udzielnikam padziej i pry zatrymańni supraciŭlaŭsia i łajaŭsia niecenzurna. U toj dzień sudździa nie vyniesła prysud i adpraviła materyjały spravy na dapracoŭku.
17 lipienia paśla pierapynku praciahnuŭsia razhlad administracyjnaj spravy Siarhieja Kałmykova. Usich śviedkaŭ apytvali ŭ sudzie nanova. Śviedki — supracoŭniki AMAPa — u hety raz užo skazali, što nie čuli, kab Kałmykoŭ łajaŭsia matam. Žonka abvinavačanaha Iryna Kałmykova taksama na sudzie była ŭ roli śviedki. Jana raspaviała, što Siarhiej nie supraciŭlaŭsia i nie łajaŭsia pry zatrymańni. Ale novyja pakazańni dapamahli apraŭdać hrodzienca tolki pa adnym artykule — 17.1 (Drobnaje chulihanstva).
«Abaraniaŭsia jak moh, ale ŭsio adno vinavaty, — kaža paśla suda Siarhiej Kałmykoŭ. — Ja pryvioŭ usie dokazy svajoj nievinavataści, zaprasiŭ śviedkaŭ, ale ŭsio roŭna mianie karajuć za niepadparadkavańnie pry zatrymańni. Vielmi niepryjemna, kali za takoje dajuć štraf 30 bazavych vieličyń. Ja nie viedaju, što rabić dalej — asprečvać ci nie. Ale hrošaj na štraf u mianie takich pakul što niama».
Kałmykova aštrafavali na 30 bazavych vieličyń (810 rubloŭ) pa artykule 23.4 (Niepadparadkavańnie supracoŭniku milicyi).
