Viadoma, trochmatčavaja sieryja bieź pieramoh nie mahła nie paŭpłyvać na turnirnaje stanovišča BATE. Blakłaja ničyja ŭ hulni sa «Słavijaj» dazvoliła «Šachcioru» ŭ pieršy raz za siezon stać lidaram tablicy.
BATE moh by akazacca naohuł čaćviortym, ale «Viciebsk» doma nie daŭ siabie abhulać «Niomanu», pierarvaŭšy tamu zajzdrosnuju sieryju ź siami pieramoh. A «Enierhietyk-BDU» bieź Jachšybojeva i Tve byŭ prosta razmazany «Rucham» ź likam 1:8.
Fota: FK «Słavija».
Pakul nie zusim jasna, jak barysaŭski kłub źbirajecca vypraŭlać situacyju. Kirył Alšeŭski kaža, što na dobryja tranśfiery ŭ kłuba niama srodkaŭ. Da taho ž jeŭrakubkavyja pierśpiektyvy sioleta davoli tumannyja, kab harantavać istotnaje papaŭnieńnie biudžetu.
Tamu BATE kapaje niehłyboka. Padpisany kantrakt z maładym paŭabaroncam «Viciebska» Siarhiejem Vołkavym, jaki z nastupnaha siezona budzie hulać za novy kłub. Taksama barysaŭcy pracujuć nad tranśfierami Alaksieja Nasko i Šachboza Umarava z «Enierhietyka-BDU».
Kali viartacca da matčaŭ minułaha tura, to varta adznačyć niekalki prakołaŭ u našych prahnozach.
My niedaacanili zapał novych «Smalavičaŭ» — kamanda vyjhrała svaju pieršuju hulniu ŭ «Isłačy» ź likam 3:1, a dublem adznačyŭsia Uładzisłaŭ Łožkin.
Pahladzicie, jak były dublor minskaha «Dynama» paździekavaŭsia z abarony «vaŭkoŭ»:
Taksama małapradkazalnaj akazałasia druhaja pieramoha «Biełšyny» ŭ čempijanacie. Žodzinskaje «Tarpieda» zabiła pieršym, ale ŭ vyniku prajhrała, dazvoliŭšy babrujcam nablizicca da miažy zony vyletu.
Voś usie vyniki matčaŭ minułaha tura:
- «Smalavičy» — «Isłač» 3:1 (21, 35, Łožkin; 78, Džyhiera — 90+1, Makaś)
- «Biełšyna» — «Tarpieda-BiełAZ» 2:1 (10, Koviel; 50, Hlabko (p) — 7, Kaplenka)
- BATE — «Słavija» 1:1 (73, Baranoŭski (ah) — 76, Čuchlej (p))
- «Šachcior» — «Haradzieja» 4:1 (7, Ancič; 38, A. Archipaŭ; 40, Ivanavič; 82, Jachšybojeŭ — 50, S. Archipaŭ)
- «Enierhietyk-BDU» — «Ruch» 1:8 (83, Muchamiedaŭ — 13, 65, 77, Kancavy; 31, Hračycha; 40, Rachmanaŭ; 43, Šaŭčenka; 62, Mihunoŭ; 86, Nikifarenka)
- «Dynama-Minsk» — «Minsk» 1:0 (26, Bachar)
- «Viciebsk» — «Nioman» 0:0
TURNIRNAJA TABLICA
A ciapier pierachodzim da matčaŭ 18 tura.
«Słuck» — «Isłač»
- 17.07, 18:00. Słuck, stadyjon «Haradski».
- Kaeficyjenty: «Słuck» (pieramoha) — 3.46; ničyja — 3.60; «Isłač» (pieramoha) — 2.21.
U «Słucka» i «Isłačy» cikavaja historyja supraćstajańnia ŭ vyšejšaj lizie: kamandy nijak nie mohuć vyjhrać adna ŭ adnoj doma.
Dzieviacimatčavaja sieryja bieź pieramoh u słuččakoŭ i haniebnaja paraza ŭ Smalavičach u «Isłačy», za jakuju vielmi chočacca reabilitavacca, — faktary, jakija kažuć na karyść taho, što tendencyja haściavych pieramoh moža praciahnucca.
Prahnoz «NN»: pieramoha «Isłačy».
«Haradzieja» — «Biełšyna»
- 17.07, 20:00. Stadyjon «Haradzieja».
- Kaeficyjenty: «Haradzieja» (pieramoha) — 2.76; ničyja — 3.60; «Biełšyna» (pieramoha) — 2.64.
U «Haradziei» — usiaho adna pieramoha ŭ apošnich dvanaccaci turach, i zona vyletu ŭsio bližej. Na padmohu «cukrovym» padpisany najlepšy bambardzir pieršaj lihi Jan Siankievič z «Lidy».
Paśla pieramohi nad žodzincami šancy «Biełšyny» na vyratavańnie stali vyhladać nie takimi mizernymi. Navat ekśpierty ŭ hulni z «Haradziejaj» krychu bolš vierać jakraz u babrujcaŭ. «Šyńnikam» zastałosia tolki apraŭdać hety davier i zrabić druhuju pałovu čempijanatu jašče bolš intryhujučaj.
Prahnoz «NN»: ničyja.
«Viciebsk» — «Smalavičy»
- 18.07, 16:30. CSK FK «Viciebsk».
- Kaeficyjenty: «Viciebsk» (pieramoha) — 1.56; ničyja — 4.15; «Smalavičy» (pieramoha) — 7.15.
Pra rolu «hrazy aŭtarytetaŭ» viciebskaj kamandy my raspaviadali ŭ papiarednim anonsie. I heta rola znoŭ paćvierdziłasia ŭ hulni z «Niomanam».
Ciapier na poŭnač Biełarusi adpraŭlajucca «Smalavičy», jakija, zdajecca, stanuć padobnyja da «Enierhietyka-BDU» ŭzoru minułaha hoda: šmat zabitych i prapuščanych miačoŭ, ale niasumna.
Novyja «Smalavičy» śviatkujuć fiejeryčnuju pieramohu nad «Isłačču». Fota: FK «Smalavičy».
Ci raskusić hety ćviordy arešak kamanda Jasinskaha?
Prahnoz «NN»: totał, bolšy za 2.5.
«Ruch» — BATE
- 18.07, 20:30. DASK «Brescki».
- Kaeficyjenty: «Ruch» (pieramoha) — 4.55; ničyja — 3.90; BATE (pieramoha) — 1.84.
Bresckaja kamanda demanstruje vydatnuju chadu: 10 zdabytych bałaŭ u apošnich čatyroch matčach i 13 zabitych miačoŭ. Takomu mahli b pazajzdrościć kamandy-lidary, ale pra prablemy BATE napisana vyšej.
«Ruch» uzmacniŭsia čarhovym hulcom bresckaha «Dynama» — Usievaład Sadoŭski musić uzmacnić atakujučuju liniju svajoj novaj kamandy. Nie vyklučana, što jon zhulaje ŭžo ŭ najbližejšaj hulni.
Prahnoz «NN»: totał, mienšy za 2.5.
«Minsk» — «Enierhietyk-BDU»
- 19.07, 16:45. Minsk, stadyjon «Traktar».
- Kaeficyjenty: «Minsk» (pieramoha) — 3.38; ničyja — 3.65; «Enierhietyk» (pieramoha) — 2.23.
Šaścimatčavaja sieryja «Minska» bieź pieramoh nie daje «haradžanam» padniacca vyšej za 14 miesca. Na piaty nastupajuć «Smalavičy», tamu treba narešcie bracca za vypraŭleńnie stanovišča.
Składana ŭjavić, što ź siabie budzie ŭjaŭlać dalej «Enierhietyk» biez svaich lidaraŭ. A jašče kali i Umarava z Nasko zabiaruć. Ale nie zabyvajem, što «studentaŭ» treniruje Anatol Jurevič — taki sivavałosy Dambłdar biełaruskaha futboła, jaki abaviazkova musić niešta prydumać. Pra miedalnyja ambicyi, chutčej za ŭsio, treba zabyć, ale kryvi «studenty» jašče papjuć.
Prahnoz «NN»: pieramoha «Enierhietyka».
«Nioman» — «Šachcior»
- 19.07, 18:45. Hrodna, CSK «Nioman».
- Kaeficyjenty: «Nioman» (pieramoha) — 4.05; ničyja — 3.55; «Šachcior» (pieramoha) — 2.03.
Siońnia «Nioman» adstaje ad salihorcaŭ na try bały, ale ŭ haradziencaŭ jašče jość u zapasie hulnia z «Minskam». Tamu pa stračanych bałach «žoŭta-zialonyja» i «žoŭta-čornyja» naraŭnie pierad vočnym dvubojem.
Mienavita pa takich matčach možna budzie mierkavać pra ambicyi «Niomana», jaki staŭ ciomnaj kabyłkaj hetaha siezona.
U pieršym kole hulnia haradziencaŭ i salihorcaŭ skončyłasia nulavoj ničyjoj, ale start u abiedźviuch kamand tady nie vydaŭsia. Što pakaža hulnia druhoha koła?
Prahnoz «NN»: totał, mienšy za 2.5.
«Tarpieda-BiełAZ» — «Dynama-Minsk»
- 19.07, 20:45. Žodzina, stadyjon «Tarpieda».
- Kaeficyjenty: «Tarpieda» (pieramoha) — 3.70; ničyja — 3.60; «Dynama» (pieramoha) — 2.12.
Paśla razhromu ad «Šachciora» žodzincy prajhrali i najhoršaj kamandzie čempijanatu. Parazu ŭ Babrujsku Juryj Puntus nazvaŭ «čornym dniom», za jaki chočacca vybačycca pierad usimi.
U Leanida Koviela 5 zabitych miačoŭ u siezonie, adzin ź jakich dapamoh pieramahčy ŭ «Tarpieda-BiełAZ». Fota: FK «Biełšyna».
Praz vysokuju ščylnaść u siaredzinie tablicy niaŭdačy «Tarpieda» adkinuli kłub na siomy radok. Na šostym z takoj ža kolkaściu bałaŭ — minskaje «Dynama», jakoje pastupova ruchajecca ŭharu.
Viasnoj minčuki byli macniejšymi za žodzincaŭ. Što budzie na hety raz?
Prahnoz «NN»: pieramoha «Dynama».
Hulnia «Słavija» — «Dynama-Brest» pieraniesienaja.
U suviazi z raspaŭsiudam karanavirusa my nie raim vam naviedvać ludnyja mierapryjemstvy, u tym liku futbolnyja matčy. Kali ŭsio ž vyrašycie pajści na stadyjon, prytrymlivajciesia mieraŭ zaściarohi.
Dzialiciesia prahnozami ŭ kamientarach. Kali ličycie siabie ekśpiertam u biełaruskim futbole, zrabicie staŭku ŭ Bukmiekierskaj kantory Leon!