Uviečary 15 lipienia ŭ Miensku ŭ rajonie Niamihi schapili karespandenta Radyjo Svaboda Antona Trafimoviča i pazaštatnuju karespandentku ahienctva BiełaPAN Vijaletu Saŭčyc. Paźniej vyśvietliłasia, što ich zavieźli ŭ Zavodzkaje RUUS. A 20:34 žurnalistaŭ vyzvalili.
Niezadoŭha da zatrymańnia Anton Trafimovič vioŭ žyvy repartaž ad budynka Centralnaj vybarčaj kamisii. Voś što jon raskazaŭ pra zatrymańnie:
«Kali ja vyjšaŭ z vulicy Miaśnikova na Niamihu, kala mianie prypyniŭsia mikraaŭtobus, adkul vybiehli 6-7 čałaviek, dvoje ŭ formie AMAPa, astatnija — u cyvilnym. Mnie zakrucili ruki za śpinaj, zasunuli ŭ rot ruku, kab ja nie kryčaŭ. Pry zatrymańni mocna stuknuli pa nosie.
U mikraaŭtobusie mianie pasadzili na padłohu na kaleni, nadzieli kajdanki za śpinaj, uvieś čas trymali hałavoj uniz. U mianie ciakła kroŭ, ale supracoŭniki milicyi na heta nie reahavali. Usia padłoha pada mnoj była ŭ kryvi, vopratka taksama zapeckanaja kroŭju.
Nichto nie pradstaŭlaŭsia, nie skazali, na padstavie čaho zatrymlivajuć. Prosta kinuli ŭ mikraaŭtobus i advieźli ŭ Zavodzkaje RUUS. Tolki tam dazvolili vymyć tvar ad kryvi. Praz hadzinu adpuścili».
