Fota Nadziei Bužan
Pradstaŭnik Kanferencyi katalickich biskupaŭ u Biełarusi ksiondz Jury Sańko paviedamiŭ «Radyjo Svabodzie», što rachunki, vystaŭlenyja parafii Čyrvonaha kaścioła, stali niečakanaściu. Ź inšymi kaściołami takoha dahetul nie było.
12 lipienia padčas słužby ŭ kaściole Śviatych Symona i Aleny ŭ Miensku viernikam paviedamili, što ŭłady naličyli padatak na ziamlu i amartyzacyju budynku ŭ pamiery 13 tysiač rubloŭ štomiesiac. Ahulny doŭh — 156 tysiač rubloŭ.
«Hetyja rachunki byli niečakanaściu dla kaścioła. Takoje zdaryłasia pieršy raz. Upieršyniu my atrymali taki rachunak, i my raźbirajemsia, čamu taki rachunak. Pa inšych kaściołach padobnyja pytańni nie ŭźnikali».
Budynki kaściołaŭ znachodziacca va ŭłasnaści abo dziaržavy, abo parafii. U Miensku kaścioł na Kalvaryi naležyć dziaržavie, a katedralny kaścioł na płoščy Svabody — parafii, jak i kaścioł na Załatoj horcy. U Mahilovie katedralny kaścioł naležyć dziaržavie.
Pytańnie viartańnia śviatyniaŭ parafijanam, pavodle ksiandza Jurja Sańko, «zaŭsiody adkrytaje, i my razmaŭlajem adnosna hetych pytańniaŭ». Heta tyčycca i Čyrvonaha kaścioła. Jon naležyć dziaržavie, kankretniej — ułasnaść Mienharvykankamu.
«Mienharvykankam pieradaŭ jaho ŭ kiravańnie «Mienskaj spadčynie» ŭ 2013 hodzie. Tamu zachady, kab kaścioł viarnuli parafii, nia pieršyja, raniej taksama prasili. Viadoma, što siońnia jany abumoŭlenyja pierš za ŭsio tym, što pryjšli nieviadomyja rachunki. Z rachunkami my ciapier raźbirajemsia, čamu takija ličby. A budzie jon viernuty ci nia budzie, heta treba pytacca ŭ Mienharvykankamu».
Čym sprava skončycca, ksiondz Jury Sańko nie prahnazuje.
«Ad nas heta nie zaležyć. My źviarnulisia z prośbaj».
U Mienharvykankamie i «Mienskaj spadčynie» na prośbu karespandenta «Svabody» sytuacyju nie prakamentavali. Raniej u «Mienskaj spadčynie», jakaja zajmałasia rekanstrukcyjaj budynku, tłumačyli, što kaścioł znachodzicca ŭ «biazvypłatnym karystańni», tamu lhotaŭ pa padatkach zakonam nie praduhledžvajecca.
«My nia majem mahčymaści płacić štomiesiac 13 tysiač rubloŭ»
A ŭ Čyrvonym kaściole praciahvajecca zbor podpisaŭ pad zvarotam da kiraŭnika Biełarusi — kaścioł ź plabanijaj prosiać viarnuć parafii. Na siońnia sabrali kala paŭtary tysiačy podpisaŭ.
«Kaścioł — dom Božy, jaki byŭ pabudavany Edvardam Vajniłovičam, jon pryznačany dla prasłaŭleńnia Pana Boha. Balšavickija ŭłady hety kaścioł adabrali ŭ viernikaŭ i zasnavali tut Dom kino. U 90-ja hady ŭsio pamianiałasia, i budynak viarnuli viernikam. Ale dahetul jon u dziaržaŭnaj ułasnaści. Jurydyčnaja asoba, jakaja vałodaje ad imia dziaržavy budynkam, — «Mienskaja spadčyna». Joj vystaŭlajuć padatki biez usialakich ilhotaŭ, i jana na aŭtamacie stavić ich kaściołu. Hetyja padatki narastajuć, i sprava moža dajści da sudu. My nia majem mahčymaści płacić štomiesiac 13 tysiač rubloŭ, bo achviaravańni viernikaŭ iduć na ŭtrymańnie śviatyni», — skazała karespandentu «Svabody» Valancina, jakaja kaardynuje zbor podpisaŭ.
Vierniki ŭžo źviartalisia ŭ Mienharvykankam z prośbaj viarnuć kaścioł parafii. Adnak Mienharvykankam admoviŭ, bo nia bačyć nieabchodnaści addavać kaścioł viernikam. Tamu ciapier buduć źviartacca da kiraŭnika dziaržavy.
«Heta boskaja sprava, i my spadziajomsia, što z boskaj dapamohaj jana budzie vyrašana. Kaścioł zbudavali dla viernikaŭ, tamu jon i pavinny być u viernikaŭ», — skazała Valancina.
