Stratehija Šviecyi pa admovie ad karancinu padčas pandemii karanavirusa z metaj vyratavańnia tempaŭ rostu ekanomiki zakončyłasia pravałam. Pra heta piša Lenta.ru sa spasyłkaj na zajavu ekanamista Džejkaba Kirkiehora (Jacob Kirkegaard) z amierykanskaha Instytuta suśvietnaj ekanomiki Pietersana, apublikavanuju ŭ The New York Times.
Pa słovach daśledčyka, praz rašeńnie nie ŭvodzić karancin dziela pabudovy ŭsieahulnaha imunitetu śmiarotnaść ad karanavirusa ŭ Šviecyi akazałasia našmat vyšejšaj za tuju, što ŭ susiednich skandynaŭskich krainach, jakija ŭvodzili režym abmiežavańniaŭ, a taksama ŭ ZŠA, jakija lidzirujuć pa liku zaražeńniaŭ i śmierciaŭ ad infiekcyi ŭ śviecie. Pry pieraliku kolkaści śmiarotnych vypadkaŭ na miljon žycharoŭ akazvajecca, što situacyja sa śmiarotnaściu ŭ Šviecyi ŭ šeść razoŭ horšaja za situacyju ŭ Danii, u siem razoŭ — za Finlandyju, u 12 razoŭ — za Narviehiju i na 40% horšaja za ZŠA.
Pry hetym karaleŭstva faktyčna nie atrymała nijakich ekanamičnych vyhod ad adsutnaści karancinu. Pavodle acenki šviedskaha Centrabanka, VUP krainy pa vynikach 2020 hoda stracić 4,5 pracenta, uzrovień biespracoŭja ŭ krainie ŭžo padniaŭsia da 9 pracentaŭ u mai z 7,1 u sakaviku. Dla paraŭnańnia, ułady Danii čakajuć, što ekanomika krainy ŭ biahučym hodzie źnizicca na 4,1 pracenta, a biespracoŭje vyraście z 4,1 da 5, 6 pracenta.
Jak rastłumačyŭ Kirkiehor, pryčynaj ekanamičnaha spadu ŭ Šviecyi stała zaležnaść krainy ad mižnarodnaha handlu. Niahledziačy na adsutnaść karancinu, šviedskaja pramysłovaść spyniłasia razam z pradpryjemstvami ŭ inšych krainach praz parušeńnie łancužkoŭ pastavak, što było pradkazalna z samaha pačatku.
Pavodle apošniaha prahnozu Jeŭrakamisii, ahučanaha ŭ lipieni 2020 hoda, VUP Šviecyi ŭ 2020 hodzie ŭpadzie na 5,3%, VUP Danii stracić 5,2%, Finlandyi — 6,3%. U cełym ekanomika ES źnizicca pa vynikach hoda na 8,3%.
Zhodna sa źviestkami Suśvietnaj arhanizacyi achovy zdaroŭja (SAAZ), na 9 lipienia 2020 hoda ŭ Šviecyi, nasielnictva jakoj składaje kala 10 miljonaŭ čałaviek, naličvajecca 73 344 vypadki inficyravańnia, ź jakich 5447 vypadkaŭ zakončylisia śmierciu.
