Pra heta kiraŭnik CVK zajaviła ŭ intervju ria.ru
CVK Biełarusi pry razhladzie pytańnia ab rehistracyi albo nierehistracyi kandydataŭ u prezidenty [apošni dzień — 14 lipienia] budzie ŭličvać lehalnaść atrymanych imi dachodaŭ, pry hetym nie maje nijakaha značeńnia, dzie mienavita palityki zachoŭvajuć svaje źbieražeńni, zajaviła Lidzija Jarmošyna.
Naprykład, Viktar Babaryka, jaki zaraz znachodzicca ŭ SIZA KDB, u dekłaracyi ab dachodzie adznačyŭ, što jaho 100 tysiač dalaraŭ zachoŭvajucca ŭ adnaho jaho siabra, jašče adna bujnaja suma, bolš za 100 tysiač jeŭra, — u druhoha siabra. «Hałoŭnaje ŭ dadzienym vypadku — zakonnaść atrymańnia dachodu, a nie toje, što hrošy zachoŭvajucca ŭ siabra. To-bok kali krynicy dachodu buduć zakonnyja, pazyčyŭ jon kamuści hrošy ci nie, nie maje nijakaha značeńnia», - zajaviła Jarmošyna, kamientujučy asablivaści dekłaracyi Babaryki.
Pa słovach Jarmošynaj, CVK nie praviaraje ni bankaŭskija rachunki, ni dzie zachoŭvaje svaje hrošy kandydat, «jon moža ich i pad matracam zachoŭvać».
Jana taksama źviarnuła ŭvahu, što dekłaracyja Babaryki, jak i dekłaracyi inšych pretendentaŭ na pasadu prezidenta, nakiravanaja ŭ profilnyja arhanizacyi, jakija zajmajucca pravierkaj hrošaj, nieruchomaści — akramia bankaŭ.
Jarmošyna ŭdakładniła, što ŭsie źviestki, jakija tyčacca hrašovych sum, jakija zachoŭvajucca ŭ bankach, składajuć tajamnicu.
U cełym, pa słovach Jarmošynaj, padstavaj dla admovy ŭ rehistracyi moža stać niedakładnaść nazvanych źviestak u pamiery, jaki pieravyšaje 20% ad hadavoha dachodu, ale heta «prava CVK, a nie abaviazak», pakolki situacyja moža aceńvacca pa-roznamu.
