Ciopłaja siaredniamiesiačnaja tempieratura ŭ Paŭnočnaj Sibiry dasiahnuła rekordnych pakazčykaŭ u červieni 2020 hoda, a ŭ niekatorych rajonach jana pieravysiła siarednija pakazčyki na 10 hradusaŭ Celsija, piša bbc.com.
Pavodle navukoŭcaŭ, takoje ciopłaje nadvorje pahoršyła situacyju ź lasnymi pažarami ŭ Sibiry, z-za čaho ŭ atmaśfieru trapiła biesprecedentnaja kolkaść vuhlakisłaha hazu — 59 młn ton.
Letniaja śpiakota — nie redkaść za Palarnym kołam, ale ŭ apošnija miesiacy tempieratury byli anamalna vysokija.
Pavodle navukoŭcaŭ, Arktyka z pryčyny hłabalnych źmianieńniaŭ klimatu nahravajecca ŭdvaja chutčej, čym astatni śviet.
I praz heta čałaviectvu varta chvalavacca, papiaredžvaje Karła Buantempa, dyrektar Jeŭrapiejskaj Słužby daśledavańnia źmianieńniaŭ klimatu imia Kapiernika.
Jak kažuć navukoŭcy, u červieni ŭ Sibiry tempieratura ŭ cełym była na 5 hradusaŭ Celsija vyšejšaja, čym zafiksavanyja raniej siarednija pakazčyki. Heta bolš, čym na hradus vyšej u paraŭnańni z papiarednimi «samymi haračymi» červieniami — u 2018 i 2019 hadach.
20 červienia ŭ Vierchajansku, adnym z samych paŭnočnych haradoŭ Jakucii, tempieratura dasiahnuła 38 hradusaŭ Celsija — heta na 18 hradusaŭ vyšej za siaredniamiesiačny maksimum červienia (zrešty, hety rekord usio jašče praviarajuć).
U mai ŭ Sibiry taksama byŭ zafiksavany miesiačny tempieraturny rekord u inšym nasielenym punkcie za Palarnym kołam — u vioscy Chatanaha tempieratura padniałasia da 25 hradusaŭ Celsija.
Pa stanie na pačatak lipienia ŭ Sibiry aficyjna było zafiksavana 246 pažaraŭ na terytoryi ŭ 1,4 tys. kvadratnych kiłamietraŭ.
Usio heta źviazana pamiž saboj, tłumačyć viadučy navukoviec centra Kapiernika Mark Parynhton.
«Vysokija tempieratury i sušejšaja pavierchnia stvarajuć idealnyja ŭmovy dla taho, kab uźnikali hetyja pažary, jakija praciahvajuć hareć na takich značnych terytoryjach», — raspavioŭ daśledčyk ahienctvu Reuters.
