Uviesnu spartyŭnyja spabornictvy pa ŭsim śviecie admianialisia praz epidemiju karanavirusa. Futbolny čempijanat Biełarusi tym časam nie spyniaŭsia, kali nie ličyć adzinkavych pieraniesienych hulniaŭ. I voś ciapier karanavirus upieršyniu ŭsurjoz zakranuŭ i biełaruskija kamandy.
Bresckaje «Dynama» — čempijon Biełarusi — 2019. Nieŭzabavie kamanda debiutuje ŭ adboračnym turniry da Lihi čempijonaŭ. Fota Darja Burakina, Tut.by
Jak stała viadoma Tribuna.com, ahulnaja kolkaść zaražanych karanavirusam u bresckim «Dynama» dasiahnuła 15 čałaviek.
Futbalistaŭ u hetym śpisie 10 čałaviek: Dzianis Łapcieŭ, Jaŭhienij Chačarydzi, Usievaład Sadoŭski, Arciom Mileŭski, Maksim Vitus, Siarhiej Kryviec, Michaił Hardziajčuk, Raman Juzepčuk, Alaksandr Najok i Siarhiej Ihnatovič. Troje apošnich znachodziacca ŭ balnicy. Jašče piaciora zaražanych — rabotniki kłuba.
Pieršyja sihnały ab karanavirusie ŭ bresckim «Dynama» źjavilisia na minułym tydni. Havorka viałasia minimum pra troch futbalistaŭ. Kłub prasiŭ Biełaruskuju fiederacyju futboła pieranieści hulniu sa «Smalavičami» z 3 lipienia na inšuju datu, ale dynamaŭcam admovili.
Adznačym, što Mileŭski, Vitus i Kryviec praviali poŭny matč sa «Smalavičami». Test, jaki daŭ stanoŭčy vynik, im zrabili tolki paśla hulni.
Tym časam vybuch karanavirusa zafiksavali i ŭ «Haradziei». Jak paviedamlaje «Presboł», u troch futbalistaŭ kamandy paćvierdžanaja chvaroba. Vydańnie pisała pra toje, što adzin ź ich, były hulec moładzievaj zbornaj Stanisłaŭ Sazanovič, znachodzicca na štučnaj vientylacyi lohkich. Na nastupny dzień «Haradzieja» abvierhła hetu infarmacyju, maŭlaŭ, u Sazanoviča prosta dvuchbakovaja pnieŭmanija.
