5 lipienia aktyvisty znoŭ abmierkavali z uładami pytańni praviadzieńnia miascovaha refierendumu pra los akumulatarnaha zavoda. Praciŭniki prablemnaj vytvorčaści sustrelisia z čynoŭnikami Bresckaha rajvykankama, piša tut.by.
Fota: Stanisłaŭ Koršunaŭ, tut.by
Novaja sustreča pa staroj prablemie prachodziła pa zvykłym scenary. Aktyvisty sabralisia kala 12:00 na płoščy Lenina, dzie dva z pałovaj hady jany štoniadzieli kormiać hałuboŭ u znak pratestu suprać budaŭnictva pradpryjemstva.
Jak i ŭ minułuju niadzielu, AMAP vycieśniŭ «akumulatarščykaŭ» ź miesca zboru ŭ aleju za pomnikam Lenina. Tym, chto aburaŭsia, milicyjanty tłumačyli, što na ŭsie ich pytańni adkažuć u aktavaj zale harvykankama, dzie na 12:30 była pryznačanaja čarhovaja sustreča ab refierendumie pra los akumulatarnaha zavoda. U minułuju niadzielu aktyvisty abmiarkoŭvali pytańni arhanizacyi plebiscytu z haradskimi ŭładami. U hetu — z rajonnymi.
U vyniku na sustreču pryjšło kala 100 čałaviek. U prezidyumie siadzieli staršynia Bresckaha rajvykankama Uładzimir Siančuk i jaho namieśnik Pavieł Vałyniec.
Pieršaje pytańnie, jakoje vynieśli na abmierkavańnie, — hieahrafija refierendumu. Kali z Brestam usio zrazumieła — horad udzielničaje ŭ hałasavańni całkam — dyk z rajonam jość niuansy. Pravodzić refierendum na terytoryi ŭsich sielsavietaŭ admovilisia. Udzielniki sustrečy pryjšli da mierkavańnia, što jość tolki dva varyjanty. Pieršy — pravieści miascovy plebiscyt u Breście i Telminskim sielsaviecie, jaki znachodzicca pobač z akumulatarnym zavodam. Druhi — padklučyć da hałasavańnia akramia abłasnoha centra ŭsie nasielenyja punkty, jakija traplajuć u 10-kiłamietrovuju zonu vakoł pradpryjemstva. Heta čatyry sielsavieta: Telminski, Čarninski, Radvanicki i Muchaviecki.
Taksama staršynia rajvykankama nahadaŭ, što raniej praciŭniki akumulatarnaha zavoda ŭžo sprabavali inicyjavać praviadzieńnie miascovaha refierendumu. Ich inicyjatyŭnuju hrupu ŭłady navat nie zarehistravali.
— U praviadzieńni refierendumu było admoŭlena, pakolki zabarona luboj dziejnaści, źviazanaj z budaŭnictvam i ekspłuatacyjaj zavoda pa vytvorčaści akumulatarnych batarej, nie ŭvachodzić u kampietencyju ni rajonnaha Savieta deputataŭ, ni rajonnaha vykanaŭčaha kamiteta. Heta pieršaje. A druhoje — hetaje pytańnie ŭžo ŭrehulavanaje zakanadaŭstvam Biełarusi, bo budaŭnictva zavoda ŭvajšło ŭ piacihadovuju inviestycyjnuju prahramu budaŭnictva Respubliki Biełaruś, jakaja zaćvierdžanaja prezidentam. Ale ciapier, u suviazi z tym, što jość daručeńnie prezidenta pravieści refierendum, u nas hetaja mahčymaść (pravieści refierendum. — TUT.BY) źjaviłasia, — patłumačyŭ Uładzimir Siančuk.
Aktyvisty nahadali pra svajo patrabavańnie pravieści da refierendumu hramadskija abmierkavańni spravazdačy ab uździejańni akumulatarnaha zavoda na navakolnaje asiarodździe.
— Jak možna pravodzić refierendum, kali zavod niebiaśpiečny? Treba dakazać, što jon biaśpiečny, tady budziem pravodzić refierendum. Usio prosta, — padkreśliŭ aktyvist Vital Kazak.
Staršynia rajvykankama ŭ adkaz paabiacaŭ, što sustreniecca z novymi ŭłaśnikami akumulatarnaha zavoda i prapanuje im zaniacca hetym pytańniem.
Uładzimir Siančuk taksama adznačyŭ, što nichto nie choča, kab na terytoryi rajona pracavała škodnaja vytvorčaść.
Praciŭniki zavoda taksama zapatrabavali skasavać šmatlikija štrafy, jakija atrymali aktyvisty za akcyi pratestu suprać pradpryjemstva. Havorka idzie pra dziesiatki tysiač rubloŭ.
— Štrafy, jakija nam davali, nieabhruntavanyja. Heta byli fors-mažornyja abstaviny, kali nam treba było abaranić intaresy svajoj siamji, svajho horada, svajoj krainy. Navat takoj canoj: IČU, štrafy. Chaj chutčej nam viernuć hrošy, jakija my zapłacili, i skasujuć tyja štrafy, jakija byli pryznačanyja, — vystupiŭ Vital Kazak.
— Vy pryznajecie niezakonnymi aryšty ludziej, jakija zmahalisia i atrymali pa 15 sutak? Vy pryznajecie jak ułada, što heta niezakonna było? — spytali z zały.
— Heta nie zusim da mianie pytańnie, — adkazaŭ Uładzimir Siančuk.
Sustreča praciahvałasia paŭtary hadziny. Pa jaje vynikach u najbližejšy čas ź liku aktyvistaŭ budzie sfarmiravana inicyjatyŭnaja hrupa pa praviadzieńni miascovaha refierendumu. Paśla hetaha baki piarojduć ad abmierkavańniaŭ da kankretnych dziejańniaŭ. Udzielniki sustrečy taksama damovilisia, što padrychtoŭka da miascovaha plebiscytu budzie iści paralelna z vyrašeńniem pytańnia ab novych hramadskich abmierkavańniach.
